ԵԱՀԿ գործող համանախագահ, Ուկրաինայի արտգործնախարար Լեոնիդ Կոժարան մտադիր է այցելել Ադրբեջան և Հարավային Կովկասի այլ երկրներ, քանի որ 2013թ. ԵԱՀԿ նախագահության շրջանակներում Լեռնային Ղարաբաղի հակամարտության կարգավորումն առաջնային խնդիրներից մեկն է Ուկրաինայի համար: Ինչպես հաղորդում է 1news.az-ը, այս մասին լրագրողներին հայտարարել է Ադրբեջանում Ուկրաինայի դեսպան Ալեքսանդր Միշչենկոն:
«Ուկրաինական կողմը նախկինում բազմիցս հայտարարել է այն մասին, որ սառեցված հակամարտությունների կարգավորումը լինելու է ԵԱՀԿ նախագահության մեր գերխնդիրներից մեկը: Թե ինչ հստակ քայլեր կձեռնարկվեն այս ուղղությամբ, կտենսեք տարվա ընթացքում: Մենք ակնկալում ենք Ուկրաինայի արտգործնախարարի այցն Ադրբեջան և տարածաշրջանի այլ երկրներ »,- ասել է նա:
Դիվանագետի խոսքերով՝ Կիևում գիտակցում են, որ Ադրբեջանն Ուկրաինայից սպասում է ԼՂ հակամարտության լուծման հստակ քայլեր, և ուկրաինական կողմը ջանում է անել ամեն ինչ՝ խնդիրը խաղաղ ճանապարհով լուծելու համար:
Դեսպանը նշել է, որ Ուկրաինայի ամենակարևոր խնդիրն է գտնել այնպիսի կետեր, որոնք կկարողանան միավորել ԵԱՀԿ Մինսկի խմբի անդամ երկրների ջանքերը և կհանգեցնեն ստատուս քվոյի փոփոխությանն ու հակամարտության կարգավորման շուրջ իրական բանակցություններ սկսելուն:
Միշչենկոյի խոսքերով՝ Կիևում այն կարծիքին չեն, որ Ուկրաինայի նախագահության ժամանակ հնարավոր է լուծել Լեռնային Ղարաբաղի խնդրի հետ կապված բոլոր հարցերը:
«Դա, հավանաբար, ռեալ չէ, և ոչ մեկ նման խնդիր չի դնում: Բայց մենք դնում ենք հավակնոտ նպատակ՝ հասնել այս հարցի տեղաշարժմանը, ինչի մասին Ուկրաինայի արտգործնախարարը հստակ հայտարարել է Վիեննայում: Այժմ ընթանում է ակտիվ երկխոսություն»,- ասել է Ուկրաինայի դեսպանը:
Միշչենկոն ընդգծել է, որ Մինսկի խումբը այսօր միակ հավանական ձևաչափն է, և անհրաժեշտ է ուղիներ գտնել դրա աշխատանքների ակտիվացման համար: