Թուրքիայի 4 գավառներում երեքշաբթի օրը սկսվել է երկրի ղեկավարության ներկայացուցիչների հեռախոսային բանակցությունների անօրինական գաղտնալսման գործով կասկածյալների ձերբակալության գործողությունը: Տեղական հեռուստատեսության հաղորդմամբ՝ մինչև հիմա 28 մարդկանցից ձերբակալվել են 19-ը, որոնց ձերբակալության թույլտվություն է տրվել՝ հայտնում է TASS-ը:
Դատախազությունը հեռահաղորդակցության և կապի վարչության 22 աշխատակցի և Գիտական ու տեխնոլոգիական ուսումնասիրությունների թուրքական խորհրդի 6 աշխատակցի ձերբակալության թույլտվություն է ստացել: Խուզարկություններ են արվում Անկարայում, Քոջաելիում և այլ շրջաններում, որտեղ հեռահաղորդակցության և կապի գերատեսչությունների բաժիններ կան:
Հիշեցնենք՝ անցած տարվա փետրվարի 25-ին թուրքական ԶԼՄ-ները տեղեկություն էին տարածել, որ 2011 թվականին հակաահաբեկչական գործողության շրջանակում, որն անցկացվել է Ստամբուլի դատախազության կողմից Salam ահաբեկչական կազմակերպության դեմ, գաղտնալսվել են մոտ 7000 մարդկանց հեռախոսներ, ովքեր կապված են ինչպես իշխող, այնպես էլ ընդդիմադիր կուսակցությունների, նաև վարչապետի ընտանիքի անդամների հետ:
Դրանից հետո Էրդողանը մեղադրեց Ֆեթուլլահ Գյուլենին (ԱՄՆ-ում բնակվող իսլամիստ հասարակական գործիչ), որ հենց նրա շարժման ներկայացուցիչներն են կանգնած հեռախոսազրույցների գաղտնալսման հետևում:
