Այսօր «Ժառանգություն» խմբակցության պատգամավոր Անահիտ Բախշյանը նամակ է ուղարկել Երևանի քաղաքապետին` Երևանի Ավան վարչական շրջանում կանաչապատ տարածքի վրա շինարարական աշխատանքների վերաբերյալ ահազանգի առնչությամբ: Նամակում մասնավորապես ասված է.
«Երևանում կանաչ տարածքների պահպանման մասին Ձեր բոլոր ելույթները ողջունելի են: Սակայն լրատվամիջոցներով հրապարակված երկու բաց նամակից տեղեկացել եմ, որ Երևանի Ավան վարչական շրջանի Իսահակյան թաղամասում` մայթի և փոստի շենքի միջև եղած կանաչ տարածքում սկսվել է շինարարություն, որի թույլտվության հրամանը` Հ.01/18-Վ-107-105, Դուք տվել եք:
2011 թվականի ապրիլի 4-ին` ժամը 11.30-12.00-ը, անձամբ այցելել եմ վերոնշյալ տարածք, որտեղ լայն թափով իրականացվում են շինարարական աշխատանքներ: Ակնհայտ էր, որ շինհրապարակի վերածված տարածքը եղել է կանաչ գոտի` գազոն, ինչի մասին վկայում է սևահողի առկայությունը:
«Ազգային ժողովի կանոնակարգ» ՀՀ օրենքի 7-րդ հոդվածի համաձայն` խնդրում եմ 10-օրյա ժամկետում տրամադրել հետևալ տեղեկությունները.
1. Վերոնշյալ հասցեի համար շինարարության թույլտվության հիմքերը։
2. Քաղաքի կամ համայնքի ճարտարապետական փորձաքննության արդյունքները։
3. Ո՞ւմ է պատկանում այդ հողակտորը։
4. Դուք անձամբ այցելե՞լ եք այդ տարածք:
5. Ինչպե՞ս կբացատրեք Ձեր խոսքի ու գործի միջև եղած այս տարբերությունը»: