Վրացական Georgiatimes.info կայքի փոխանցմամբ, հակամարտությունների գծով վրաց հայտնի փորձագետ Պաատա Զաքարեիշվիլին հայտարարել է, որ Վրաստանը պետք է Աբխազիայի ու Հարավային Օսիայի մարզիկներին թույլատրի հանդես գալ սեփական դրոշներով.
«Դրանից առաջին հերթին կշահի հենց Վրաստանը: Եթե աբխազ և օս մարզիկները միջազգային մրցաշարերում հաջողության հասնեն, ապա դա կգրանցվի Վրաստանի ակտիվում: Եթե նրանք չհամաձայնեն դրան, ապա մեդալներ ու պարգևներ չեն ստանա:
Վրացական իշխանությունները պարտավոր են մեծ ուշադրություն դարձնել Աբխազիայում և Հարավային Օսիայում քաղաքականության հետ կապ չունեցող ոլորտների` սպորտի, մշակույթի և այլ խնդիրների զարգացմանը: Մեծ վտանգ է պարունակում այն, որ մենք մեկուսացնում ենք այդ մարզիկներին, ինչի արդյունքում էլ աբխազ մարզիկները հանդես են գալիս Ռուսաստանի անունից, և Վրաստանը չի կարողանում վերահսկել այդ գործընթացը:
Մեր որդեգրած մեկուսացնող քաղաքականությունն էլ ավելի է հեռացնում նրանց վրացական պետությունից»:
Հիշեցնենք, որ սրանից առաջ էլ վրաց փորձագետը հայտարարել էր, որ եթե պաշտոնական Թբիլիսին շարունակի Աբխազիայի ու Հարավային Օսիայի նկատմամբ իր մեկուսացնող քաղաքականությունը, ապա դա կհանգեցնի այդ երկու հանրապետությունների հանդեպ համաշխարհային համակրանքի աճին.
«Եթե Վրաստանը շարունակի աբխազներին ու օսերին մեկուսացնելու միտումը, ապա 10 տարի անց աշխարհը ցանկություն կունենա իրականացնել այն, ինչ ոչ վաղ անցյալում տեղի ունեցավ Կոսովոյի պարագայում»: