Երեկ երեկոյան Լիբիայի պետական հեռուստատեսությունը ցուցադրեց ուղիղ եթեր Տրիպոլիի հրապարակներից մեկից, որտեղ այդ երկրի առաջնորդ Մուամար Քադաֆին ողջունում է իր կողմնակիցներին: Համենայդեպս, այդպես է ներկայացրել հեռուստատեսությունը, որովհետև կադրերն արված են եղել շատ հեռվից, և պարզ չի եղել` դա Քադաֆին է, թե այլ մարդ: Հեռուստաեթերն ուղեկցվել է «Մեր եղբայր առաջնորդը՝ շրջապատված իր կողմնակիցներով» տիտրերով:
Երեկ Լիբիայի իշխանությունները նաև հայտարարել են, որ պատրաստ են քննարկել երկրում ժողովրդավարական բարեփոխումներ անցկացնելու հարցը, սակայն նշել են, որ միայն Լիբիայի ժողովուրդը պետք է քննարկի, թե ով պետք է լինի իր առաջնորդը` Մուամար Քադաֆի՞ն, թե՞ այլ քաղաքական գործիչ: Այս մասին հայտարարել է ԼԻբիայի կառավարության ներկայացուցիչ Մուսա Իբրահիմը:
«Մենք կարող ենք ունենալ ցանկացած քաղաքական համակարգ, ցանկացած փոփոխություններ` սահմանադրություն, ընտրություններ, ինչ հնարավոր է: Սակայն մեզ պետք է առաջնորդի մեր ղեկավարը: Սա է մեր դիրքորոշումը»,- ասել է նա: Այս մասին հաղորդում է BBC-ն:
Դիմելով Արևմուտքին, նա ասել է. «Ովքե՞ր եք դուք, որ որոշեք, թե ինչ պետք է անի Լիբիայի ժողովուրդը: Ինչո՞ւ թույլ չտալ Լիբիայի ժողովրդին որոշելու իր ապագան: Մնա՞ մեր առաջնորդն իր պաշտոնին, թե՞ ոչ: Արդյոք անհրաժե՞շտ է փոխել քաղաքական համակարգը»,- ավելացրել է Իբրահիմը:
France Presse գործակալությունը նաև փոխանցում է, որ Իբրահիմը երկրի ղեկավարության անունից հայտարարել է, որ Լիբիայի իշխանությունները պատրաստ են անցկացնել «ընտրություններ և հանրաքվե», սակայն այդ ամենի երաշխավորը պետք է լինի Քադաֆին:
Քադաֆիի մնալուն կողմ է արտահայտվել նաև ընդդիմադիր շարժման խոսնակը: Ըստ Al-Jazeera-ի՝ նա ասել է, թե «Քադաֆին պետք է ղեկավարի երկիրը, սակայն պետք է արմատական փոփոխություններ իրականացի»: Ընդդիմադիրներն ասել են, որ եթե Քադաֆին համաձայն է այս տարբերակին, ապա ընդդիմությունը պատրաստ է նստել բանակցությունների սեղանի շուրջ:
