Նախնական տվյալներով, Հայիթիի նախագահ է ընտրվել Միշել Մարտինելլին: Այս մասին հաղորդում է France Presse գործակալությունը` հղում անելով տեղի ընտրական հանձնաժողովին:
Հետաքրքիր է, որ Մարտինելլին Հայիթիում շատ հայտնի երգիչ է: Ընդ որում, նախագահական քարոզարշավի ընթացքում նրան աջակցում էր նաև ԱՄՆ-ում հայտնի Ուայքլեֆ Ջինը, որն ունի հայիթիական ծագում: Ջինը նախագահական ընտրությունների սկզբում հայտարարել էր, որ մասնակցելու է դրանց, սակայն նրան դա արգելվել էր, քանի որ կյանքի մեծ մասն ապրել էր ԱՄՆ-ում և չուներ Հայիթիի քաղաքացիություն:
Մարտինելլին ստացել է ընտրողների ձայների 67.57%-ը: Նրա հիմնական հակառակորդ, երկրի առաջին տիկին Միրլանդ Մանիգան հավաքել է 31.74%-ը: Ընդ որում, Մարտինելլին չպետք է մասնակցեր նախագահական ընտրությունների երկրորդ փուլին, քանի որ երկրորդ փուլ էր անցել գործող նախագահ Ռենե Պրևալի հետնորդը համարվող Ժյուդ Սելեստենը: Եվ միայն բողոքի մեծ ակցիաներից հետո Սելեստենին հանեցին, ու երկրորդ փուլին մասնակցելու իրավունք ստացավ Միշել Մարտինելլին:
