Մի քանի օր առաջ Вести.Ru-ն գրել էր մի տղամարդու մասին, ով գնացքից ընկնելով՝ 45 աստիճան ցրտին 7 կմ վազել է մինչև մոտակա կայարանը: Այն, որ Բրատսկի բնակիչը կենդանի է մնացել, ուղղակի հրաշք է:
Այսօր նա իր տպավորություններով կիսվել է Openspace ռեսուրսի օգտատերերի հետ: Տղամարդը, ով մասնագիտությամբ վարորդ է, Բրատսկից Ալդան է ուղևորվել: Երեկոյան ժամը տասին նա դուրս է եկել ծխելու, սակայն սխալ դուռ է բացել և ցած ընկել:
«Առաջին միտքը վեր կենալ և վազելն էր: Այնպես որ ես որոշեցի վազել գնացքի ուղղությամբ»,- պատմել է տղամարդը: Նրա հագին ջինս, վերնաշապիկ և ռետինե հողաթափեր են եղել: Տղամարդը կենդանիներից չի վախեցել:
Երբ նա հասել է կայարան, հերթապահը շատ է զարմացել, թեյ է լցրել և զանգահարել ոստիկանություն: Կնոջը տղամարդը չի զանգահարել, նա առանց այն էլ ամեն ինչ ԶԼՄ-ներից է իմացել:
Սակայն տղամարդը վրդովվում է, որ ԶԼՄ-ները գրում են, թե իբր ինքը հարբած է եղել:
Այդ գիշեր նա ամեն դեպքում հասել է իր գնացքին, բարձրացել է իր տեղը և քնել: Առավոտյան արթնացել է և մի քիչ մտածել սեփական կյանքի մասին: Սակայն դա արդեն անձնական հարց է: