Իրանում հայտնաբերվել է «Կարմիր հոկտեմբեր» անվանում կրող համակարգչային վիրուս: Այս մասին հայտնում է ILNA գործակալությունը՝ հղում անելով երկրի Կապի և տեխնոլոգիաների նախարարության հաղորդագրությանը:
Կապի և տեխնոլոգիաների նախարարի տեղակալ Ալի Հակիմ-Ջավադին հերքել է տեղեկությունը՝ հավելելով, որ իրանցի մասնագետները կարողացել են կանխել վիրուսի ներթափանցումը տեղի հաստատությունների և կազմակերպությունների ցանցեր:
Հաքիմ-Ջավադիի խոսքով՝ վիրուսը փորձել է ներթափանցել տեղական համակարգչային ցանցեր և դիվանագիտական կենտրոններ՝ կոտրելու հասանելիությունը դեպի գաղտնի տեղեկություններ:
Մոտ մեկ շաբաթ առաջ «Կասպերսկու» լաբորատորիան հաշվետվություն է հրապարակել կիբերհանցագործների անցկացրած լայնամասշտաբ արշավի հետազոտության վերաբերյալ: Կիբերհանցագործները հիմնական շեշտը դրել են նախկին ԽՍՀՄ հանրապետությունների, Արևելյան Եվրոպայի երկրների, ինչպես նաև Կենտրոնական Ասիայի մի շարք պետությունների վրա:
«Կարմիր հոկտեմբեր» վնասակար ծրագիրը, որն ունի յուրօրինակ մոդուլային ճարտարապետություն, «Կասպերսկու լաբորատորիայում» հիշատակվում է Backdoor.Win32.Sputnik անվամբ:
