Վրացական Apsny.ge կայքի հաղորդմամբ, Վրաստանի նախկին նախագահ Էդուարդ Շևարնաձեն վրացական լրատվամիջոցներին տված հարցազրույցի ժամանակ անդրադարձել է վրացական ընդդիմության խնդիրներին.
«Ես հավատում եմ, որ ընդդիմությունը երբևէ «խելք կհավաքի», կվերածվի լուրջ ուժի և մոռացության կմատնի իր ներսում ծագած փոքր կոնֆլիկտները: Դա, մասնավորապես, վերաբերում է «Վրացական կուսակցության» առաջնորդ Լևան Գաչեչիլաձեին և Նինո Բուրջանաձեի ամուսին Բադրի Բիցաձեին: Նրանք երկուսն էլ «խելացի երեխաներ» են և «կիսելու ոչինչ չունեն»:
Վստահ եմ, որ շուտով նրանք կմոռանան ամեն ինչ և համատեղ կգործեն՝ հանուն երկրի բարօրության: Նրանց վեճը լրջորեն չի անդրադառնա վրացական ընդդիմության պատկերի վրա: Վերջիվերջո, ընդդիմությունը կհասկանա, որ ընդհանուր գործի համար անհրաժեշտ է միավորվել»:
Հիշեցնենք, որ օրեր առաջ Մյունխենում ընդհարվել էին վրացական ընդդիմության ներկայացուցիչները: Դրանում ակտիվ մասնակցություն էին ունեցել նաև Վրաստանի նախագահի նախկին թեկնածու Լևան Գաչեչիլաձեն և սահմանապահ ոստիկանության նախկին պետ, խորհրդարանի նախկին խոսնակ Նինո Բուրջանաձեի ամուսին Բադրի Բիցաձեն:
Նրանց հակամարտությունը, որը Մյունխենում ավարտվեց ծեծկռտուքով, սկսվել է դեռևս 2010 թվականին, երբ վրացական լրատվամիջոցները տեղեկատվություն տարածեցին այն մասին, որ 2008 թվականին կայացած նախագահական ընտրություններից հետո նախագահ Սաակաշվիլիի հակառակորդ Գաչեչիլաձեն գաղտնի բանակցություններ է վարել նրա հետ` պահանջելով վարչապետի պաշտոնն ու մոտ 20 միլիոն դոլար:
Հակառակ դեպքում Գաչեչիլաձեն սպառնացել էր ակտիվացնել փողոցային անկարգությունները: Նշվում է, որ այդ սպառնալիքը մասամբ էր աշխատել, և 20 միլիոն դոլարի փոխարեն նա ստացել էր 1-2 միլիոն դոլար:
