Գալիք նախագահական ընտրություններում «Ազատ դեմոկրատներ» կուսակցության վարչությունը ՀՀ նախագահի որևէ թեկնածուի սատարելու որոշում դեռևս չունի: «Առաջին լրատվական»-ի հետ զրույցում այս մասին ասաց «Ազատ դեմոկրատներ» կուսակցության մամլո խոսնակ Անժելա Խաչատրյանը: Նա հիշեցրեց, որ դեկտեմբերի վերջին կուսակցության հայտարարության մեջ հստակ նշել էին, որ ուսումնասիրելու են ընդդիմադիր թեկնածուների ծրագրերը և ըստ այդմ ներկայացնելու իրենց մոտեցումներն ու դիրքորոշումները:
«Բնականաբար, կուսակցության համար առաջնայինն է այն, որ այն թեկնածուն, ում կսատարենք, ներկայացնի ազատական դաշտը, և նրա ծրագրերը համապատասխանեն մեր կուսակցության ծրագրային դրույթներին և մոտեցումներին: Մեզ համար որևէ թեկնածուի սատարելն ինքնանպատակ չէ, մենք պետք է համոզված լինենք, որ դրանով ինչ-որ բան ենք փոխելու քաղաքական գործընթացներում: Առաջիկայում կքննարկենք մեզ համար կարևոր հարցերը: Քարոզաշավը մեկնարկում է հունվարի 21-ին, իսկ մինչ այդ կարող են լինել թեկնածուներ, որոնք կհրաժարվեն ընտրապայքարից, ուստի շտապել պետք չէ»,- նշեց Անժելա Խաչատրյանը:
«Առաջին լրատվական»-ի հետ զրույցում Հայաստանի նախկին արտգործնախարար, «Ազատ դեմոկրատներ» կուսակցության անդամ Ալեքսանդր Արզումանյանն, անդրադառնալով «Ազատություն» ռադիոկայանին տված իր հարցազրույցին, որը վերնագրված է ««Ազատ դեմոկրատներ»-ը հակված է սատարելու Բագրատյանին», ասաց, որ նշել է, որ իրենց հոգեհարազատ է Հրանտ Բագրատյանի ծրագիրը, որպես ազատական ուժի: Նա ևս նշեց, որ կուսակցությունը դեռևս որոշում չունի:
Հիշեցնենք՝ Հայաստանի նախկին արտգործնախարար, «Ազատ դեմոկրատներ» կուսակցության անդամ Ալեքսանդր Արզումանյանն ասել էր, որ «Ազատ դեմոկրատներ» կուսակցությունը փետրվարին կայանալիք նախագահական ընտրություններում, ամենայն հավանականությամբ, կսատարի նախկին վարչապետ, «Ազատություն» կուսակցության նախագահ, ՀԱԿ-ի խորհրդարանական խմբակցության պատգամավոր Հրանտ Բագրատյանին: «Այս պահին ուսումնասիրում ենք ծրագրերը: Դեռևս միայն ընդդիմադիրներից Հրանտ Բագրատյանն է հստակ ծրագիր ներկայացրել, որը ազատական է, շատ հոգեհարազատ է մեր գաղափարախոսությանը», – ասել էր Ալեքսանդր Արզումանյանը:
