Ղազախստանի նախագահ Նուրսուլթան Նազարբաևը հայտարարել է, որ Հավաքական անվտանգության պայմանագրի կազմակերպությունը (ՀԱՊԿ) բաց է այլ կազմակերպությունների և երկրների հետ փոխգործակցության համար: Այս մասին հայտնում է Ria Novosti-ն՝ հղում անելով այդ երկրի ղեկավարի մամլո ծառայությանը:
Մոսկվայում ՀԱՊԿ անդամ երկրների ղեկավարների հետ հանդիպման ժամանակ Նազարբաևը նշել է, որ ՀԱՊԿ անդամ բոլոր երկրների ընդհանուր առաջադրանքը անվտանգության ամրապնդմանն աջակցելն է, տարածաշրջանում զարգացման խաղաղ և կայուն պայմանների ապահովումը:
«Կազմակերպությունը բաց է այլ պետությունների և միջազգային կազմակերպությունների հետ կառուցողական փոխգործակցության համար: Հուսով եմ՝ նիստում ընդունվելիք որոշումները հնարավորություն կտան էլ ավելի ամրապնդել ՀԱՊԿ անդամ երկրների միջև համագործակցությունը անվտանգության ապահովման ոլորտում և բարձրացնել գործունեության ակտիվությունը»,- ասել է Նազարբաևը, որի խոսքը մեջբերում է մամլո ծառայությունը:
Հաղորդագրության համաձայն՝ պետությունների ղեկավարները քննարկել են իրավիճակը Կազմակերպության պատասխանատվության գոտում, քննարկել են ՀԱՊԿ ճգնաժամային արձագանքման համակարգի վիճակը անվտանգության գլոբալ և տարածաշրջանային մարտահրավերների ֆոնին:
