Չիմանալով ինչով զբաղվել աշխատավայրում՝ նյույորքցի 2 վեբ-դիզայներ որոշել են համաշխարհային գեղանկարչության գլուխգործոցները «վերարտադրել» բջջային հեռախոսով: Այս մասին հայտնում է The Daily Mail-ը:
Լուսանկարների գլխավոր հերոսները հենց գաղափարի հեղինակներն են՝ Ֆրանչեսկո Ֆրագոմենին և Քրիս Լիմբրիքը: «Վերարտադրությունների» ստեղծման հիմնական կանոնն է՝ օգտագործել միայն ձեռքի տակ եղած առարկաները և լուսանկարները խմբագրել բջջային հավելվածներով:
Ստացված լուսանկարները ցուցադրելու համար երիտասարդներն էջեր են ստեղծել Instagram-ում և Tumblr-ում, իսկ պարզապես անմեղ զվարճանքը վերածվել է արտ-նախագծի՝ «Հիմարներն արվեստ են ստեղծում» (Fools do art) անվանումով: Ժամանակի ընթացքում այդ գաղափարն իրականացրել են այլ մարդիկ ևս, և էջերը սկսել են համալրվել ոչ միայն Ֆրագոմենիի և Լիմբրիքի լուսանկարներով:
Վեբ-դիզայներները ներկայացրել են Լեոնարդո դա Վինչիի «Մոնա Լիզայի», Յան Վերմերի «Մարգարտե ականջօղով աղջկա» և այլ հայտնի գործերի իրենց տարբերակները:
