Ինչպես և ակնկալվում էր, Ղազախստանում ընտրություններն անցան իշխանությունների նախանշած սցենարով և ոչ մի անակնկալ չգրանցվեց: Արդեն որերորդ անգամ Ղազախստանի նախագահ ընտրվեց Նուրսուլթան Նազարբաևը:
Բացի Նազարբաևից՝ «ընտրություններ» միջոցառմանը մասնակցում էին ևս երեք թեկնածու` Կոմունիստական կուսակցության նախագահ Ժամբիլ Ահմեդբեկովը, Հայրենասերների կուսակցության առաջնորդ, սենատոր Գանի Կասիմովը և էկոմիության ղեկավար Մելս Ելեուսիզովը: Զավեշտը հասել է նրան, որ Ելեուսիզովը քվեարկելուց հետո ասել է, թե իր ձայնը տվել է Նազարբաևին. «Ընտրությունները մրցակցություն են, և բոլոր մարզիկները միշտ, ի վերջո, սեղմում են միմյանց ձեռքը՝ չնայած կռվին և մյուս բաներին: Այս կերպ ես, այսպես ասած, արտահայտել եմ հարգանքս հաղթողի նկատմամբ»,- ասել է նա: Այս մասին հաղորդում է Interfax գործակալությունը:
Բոլոր աղբյուրները նշում են, Ղազախստանի գործող նախագահը հավաքել է ձայների ավելի քան 94%-ը, և նրա հաղթանակը կասկած չի հարուցում: Ընտրություններին հետևել են ավելի քան 1000 միջազգային դիտորդներ և լրագրողներ:
