Այսօր` հունվարի 17-ին, ինքնասպանություն է տեղի ունեցել Երևանում: Ժամը 11:15-ի սահմաններում 45-50 տարեկան տղամարդը Կիևյան կամուրջից իրեն ցած է նետել:
Ինչպես հայտնում է shamshyan.com-ը, այս պահին ժամանել են Ոստիկանության Մաշտոցի բաժնի օպերատիվ խումբը` Մաշտոցի ոստիկանապետ Արտակ Պողոսյանի գլխավորությամբ, ինչպես նաև ՀՀ արտակարգ իրավիճակների նախարարության փրկարար ծառայության օպերատիվ կառավարման կենտրոնի հերթապահ խումբը և հատուկ փրկարարական ջոկատը:
shamshyan.com-ը հայտնում է, որ Մաշտոցի ոստիկանության օպերատիվ խումբը Կիևյան կամուրջի վրա հայտնաբերել է երկտող, որտեղ մասնավորապես գրված է. «ես զոհ եմ գնում հանուն իմ ծնողների, բարեկամների ու հարազատների համար»:
Սակայն դա նրա կողմից է գրված, թե ոչ` կպարզվի քննության ընթացքում: Այս պահին ոստիկանության Մաշտոցի բաժնի օպերատիվ խումբը ձեռնարկում է օպերատիվ միջոցառումներ` պարզելու համար մահացածի ինքնությունն ու բնակության վայրը:
Ժամանել է նաև շտապօգնության 1-03 ծառայության բրիգադան, սակայն, քանի որ կամուրջից ցած նետվածը տեղում մահացել է` նրանց կանչով դեպքի վայր է ժամանում դատական բժիշկը: Մաշտոցի ոստիկանապետի հանձնարարականով դեպքի վայր է ժամանում ոստիկանության քննչական գլխավոր վարչության Երևանի քննչական վարչության Մաշտոցի քննչական բաժնի քննիչը:
