«Ժողովուրդ» թերթը գրում է. «Կիրակի օրը ՀՀ ոստիկանությունը հաղորդագրություն տարածեց այն մասին, որ բերման է ենթարկվել դեկտեմբերի 11-ի երեկոյան ԱԺ ՀԱԿ խմբակցության քարտուղար Արամ Մանուկյանի վրա հարձակում կատարած անձը: Ըստ հաղորդագրության՝ հարձակում կատարածը 1973 թ. ծնված Արշակ Սվազյանն է: Նրան մեղադրանք է առաջադրվել ՀՀ քրեական օրենսգրքի 117 հոդվածի հատկանիշներով՝ դիտավորությամբ առողջությանը թեթև վնաս պատճառելը, պատժվում է 50-ից 150 հազար դրամի տուգանքով կամ երկամսյա կալանքով: Ոստիկանության տեղեկատվական արտահոսքի համաձայն՝ Սվազյանն իբր արտագնա աշխատանքի մեկնող անձ է և նոր է վերադարձել Ռուսաստանից:
Իր արարքը բացատրել է նրանով, որ իբր ադրբեջանցիները ծաղրել են իրեն, քանի որ Հայաստանում Սերժ Սարգսյանին հայհոյում են, ոչ մեկը նրա պատիվը չի պահում: Ավելի ուշ պարզվեց, որ Արշակ Սվազյանը Աժ ՀՀԿ խմբակցության անդամ Առաքել Մովսիսյանի՝Շմայսի շրջապատից է: Սակայն պատգամավորն «Ա1+»-ին ասել է, թե իրեն զրպարտում են, և՝ «Աստծո պատիժին իրենց գլխին»: Ինչպես արդեն «Ժողովուրդը» կանխատեսել էր, այս անգամ ևս գործ ունենք իրավապահների կազմակերպած «օպերացիայի» հետ, որով փորձ է արվում շեղել հրամանատարների ծեծի խայտառակ փաստը: Սակայն, ինչպես միշտ, ամեն ինչ վերին աստիճանի փնթի են կազմակերպել: Նախ ընտրել են կատարողին, որի կապն իշխանությունների հետ մի քանի ժամում պարզվեց:
Արարքի պատճառաբանությունն էլ «Գյուլնազ տատի» հեքիաթներից է: Սցենարիստը հաշվի չի առել, որ Ռուսաստանում ապրող հայերը և ադրբեջանցիները ոչ միայն քաղաքական վեճեր չեն ունենում, նրանք նաև շատ հաճախ գործընկերներ են դառնում: Իսկ որ ամենակարևորն է՝ արտագնա աշխատանքի մեկնող հայը և ադրբեջանցին երկուստեք ատում և ամենավերջին հայհոյանքն են տալիս իրենց իշխանություններին, որոնց պատճառով ստիպված են օտար երկրներում ապրուստ վաստակել»:
Մանրամասները՝ թերթի այսօրվա համարում։