Վենեսուելայի նախագահ Ուգո Չավեսը վերականգնվում է քաղցկեղային ուռուցքի հեռացման վիրահատությունից հետո: Այս մասին հայտնել է երկրի փոխնախագահ Նիկոլաս Մադուրոն` փոխանցում է Associated Press-ը:
«Կարելի է վստահ ասել, որ նախագահն ապաքինվում է: Նա վերականգնվում է վիրահատությունից հետո և շարունակում պայքարը»,- ասել է փոխնախագահը: Նա Չավեսի հետ հանդիպել է հիվանդանոցում և նրա հետ քննարկել Վենեսուելայի կառավարության ծրագրերը: Հանդիպմանը մասնակցել են նաև երկրի նավթի և հանքարդյունաբերության նախարար Ռաֆայել Ռամիրեսն ու այլ բարձրաստիճան պաշտոնյաներ:
Հիշեցնենք՝ ներկայումս Ուգո Չավեսը բուժվում է Հավանայի հիվանդանոցներից մեկում: Նրա նախագահական երրորդ ժամկետի երդմնակալության արարողությունը նշանակված էր 2013-ի հունվարի 10-ին: Հանդիսավոր մասն անցկացվել է առանց Չավեսի մասնակցության, պաշտոնականը հետաձգվել է անորոշ ժամանակով՝ չնայած կրկնակի նախագահական ընտրություններ անցկացնելու ընդդիմության պահանջներին:
