«ՀՀ իշխանությունները ռուսական կայսրության սատրատներն են»,- «Առաջին լրատվական»-ի հետ զրույցում ասաց նախկին քաղբանտարկյալ, Ազգային միացյալ նախաձեռնության համակարգող Շանթ Հարությունյանը՝ անդրադառնալով ԵՄ-Եվրասիական միություն երկընտրանքին:
Նա նշեց, որ շատերը նույնիսկ չեղած երևույթների միջև են չարչարվում ընտրություն կատարել: Սակայն Շանթ Հարությունյանի համար ընտրությունը ԵՄ-ի և Եվրասիական միության միջև չէ, այլ ԵՄ-ի և նախկին գաղութի կարգավիճակի միջև:
«Ես վստահ չեմ, որ ԵՄ-ն Հայաստանը գաղութ չի դարձնի, սակայն դա հարց է, իսկ մյուս դեպքում հաստատ գաղութ կդառնա: Նախկինում կոչվում էր Սովետմիություն, իսկ այսօր` Եվրասիական միություն: Ինձ համար համեմատության եզրեր չկան»,- հստակեցրեց Շանթ Հարությունյանը:
Վերջինս տեղեկացրեց, որ այս հարցի վերաբերյալ իշխանության դիրքորոշումը իրեն չի հետաքրքրում, քանի որ իշխանությունը գաղութի սատրատն է: Ըստ նրա՝ իրենց դիրքորոշումը`լինի չեզոք, պարզ, դեմ, թե ինքնուրույն, միևնույն է` դա սուվերեն պետության իշխանավորների դիրքորոշում չէ, որ քննարկման առարկա դառնա:
«Ինչպես էլ իրենց պահեն, ինձ համար ռուսական կայսրության սատրապների պահվածք է, դրա ի՞նչը քննադատեմ, ի՞նչը բացատրեմ»,- կարծիք հայտնեց Շանթ Հարությունյանը: