Վրաստանը կփորձի բարելավել հարաբերությունները Ռուսաստանի հետ, սակայն Թբիլիսիի համար առաջնային է եվրոատլանտյան ինտեգրումը: Ինչպես հաղորդում է «Գրուզիա Օնլայնը», այս մասին Ռիգայում հայտարարել է Վրաստանի արտգործնախարար Մայա Պանջիկիձեն:
«Մենք կփորձենք լավացնել հարաբերությունները Ռուսաստանի հետ, բայց մենք չենք անդամակցի որևէ դաշինքի կամ միության, բացի Եվրամիությունից և ՆԱՏՕ-ից»,- ասել է նա Լատվիայի արտգործնախարար Էդգարս Ռինկևիչի հետ հանդիպումից հետո:
Պանջիկիձեն ընդգծել է, որ Վրաստանի նոր կառավարությունը հետևում է ժողովրդի կամքին, այդ պատճառով երկիրը կշարունակի արևմտյան կառույցներին ինտեգրվելու ուղղությունը:
Դրա հետ մեկտեղ, արտգործնախարարը նշել է, որ իրեն հայտնի են Արևմուտքի մտավախությունները՝ կապված Վրաստանում մարդու իրավունքների և օրենքի իշխանության ոստնահարման հետ: Նա կոչ է արել չթատերականացնել իրավիճակը և սպասել Վրաստանի նախկին իշխանությունների առաջատար ներկայացուցիչների գործունեության հետաքննության ավարտին:
Երեքշաբթի եվրոպական շրջագայության շրջանակներում Պանջիկիձեն մեկնելու է Չեխիա, որտեղ հանդիպելու է երկրի պաշտոնական անձանց հետ: