Ռուսական Rian.ru կայքի փոխանցմամբ, Վրաստանի նախկին նախագահ Էդուարդ Շևարնաձեն ռուսական լրատվամիջոցներին տված հարցազրույցի ժամանակ անդրադարձել է ԽՍՀՄ փլուզմանը.
«Տվյալ ժամանակ ԽՍՀՄ լիդերներն ամեն ինչ արեցին դրա կործանման համար՝ փոխանակ վարվեին հակառակ կերպ: ԽՍՀՄ փլուզումն իրականացավ Միխայիլ Գորբաչովի և Բորիս Ելցինի հակամարտության պատճառով: ԽՍՀՄ փլուզումից դեռ 4 տարի առաջ ես կանխագուշակել էի, որ փլուզումն անպայմանորեն վրա է հասնելու, սակայն կարծում էի, որ դա տեղի կունենար 11-12 տարի անց:
Ես կարծում եմ, որ ԽՍՀՄ փլուզման մեկնարկը տրվել է Նիկիտա Խրուշչովի ժամանակ: Մինչ այդ ԽՍՀՄ-ում մարդիկ ապրում էին ավելի լավ, քան նույնիսկ հիմա: Մինչդեռ Խրուշչովը փլուզեց ամեն ինչ, և ժողովուրդը սկսեց սովի մատնվել:
Երբ Մոսկվայում հանդիպեցի Հենրի Քեսինջերին, նա ինձ ասաց, որ ԱՄՆ-ը մշտապես ԽՍՀՄ-ը դիտարկել է որպես թշնամական երկիր և ամեն ինչ արել է նրա փլուզմանը նպաստելու համար: Մինչդեռ այժմ, երբ դա արդեն փաստ է, ԱՄՆ-ը չգիտի, թե ինչ պետք է անել: Այսինքն՝ ԱՄՆ-ում չէին պատկերացրել, որ ԽՍՀՄ-ն այդքան արագորեն կփլուզվեր:
Գորբաչովն այժմ հայտարարում է, թե ՆԱՏՕ-ն իրեն խաբել է դեպի արևելք չծավալվելու հարցում: Սակայն իրականում ոչ ոք ոչ ոքի չի խաբել: Դա գրանցվել է բանակցությունների արդյունքում»:
Հիշեցնենք, որ ԽՍՀՄ փլուզման պատճառների մասին գոյություն ունեցող վարկածներից մեկի համաձայն էլ, Բորիս Ելցինը ցանկանում էր կործանել Միխայիլ Գորբաչովին, սակայն կործանեց ԽՍՀՄ-ը: