Մոսկվայի և Անկարայի միջև էներգետիկ դաշինքի ձևավորումը կնշանակի Թուրքիայի արտաքին քաղաքականության կտրուկ փոփոխություն, որը մինչև հիմա Կենտրոնական Ասիայից արևմուտք նավթի և գազի հիմնական երթուղի է եղել՝ շրջանցելով Ռուսաստանին: Այս մասին գրում է Today’s Zaman-ը:
Պարբերականը հիշեցնում է, որ Ռուսաստանը Թուրքիային առաջարկել է գազային հանգույց կառուցել Հունաստանի հետ սահմանին՝ ԵՄ երկրներ էներգառեսուրսների փոխադրումներն ապահովելու և «Հարավային հոսքի» կորուստը փոխհատուցելու համար:
Հանուն Ռուսաստանի հետ տնտեսական հարաբերությունների՝ Թուրքիան ձգտում է հարթել մի շարք միջազգային հարցերի շուրջ հակասությունները, նշում է Today’s Zaman-ը:
Անկարան և Մոսկվան հակադիր հայացքներ ունեն Սիրիայի և Ղրիմի շուրջ իրավիճակների հարցում, ասվում է նյութում: Առաջին դեպքում Թուրքիան, ի տարբերություն Ռուսաստանի, պնդում է Բաշար Ասադի ռեժիմի տապալման հարցում, երկրորդ դեպքում անհանգստություն է հայտնում Ղրիմի թաթարների ճակատագրի վերաբերյալ:
Թուրքիան չի միացել Ռուսաստանի նկատմամբ միջազգային պատժամիջոցներին և հիմա տարված է Մոսկվայի պատասխան միջոցներից հետո արևմտյան շատ արտահանողների համար փակ ռուսական շուկաներ սննդամթերքի արտահանման աճի հեռանկարով: Թուրքիան արդեն ռուսական գազի խոշորագույն ներկրողն է՝ երկրորդը Գերմանիայից հետո: Ռուսաստանը մասնակցում է առաջին թուրքական ԱԷԿ-ի շինարարությանը: Թուրքական շատ ընկերություններ աշխատում են Ռուսաստանի տարածքում, միլիոնավոր ռուս զբոսաշրջիկներ ամեն տարի մեկնում են Թուրքիա, ասվում է հոդվածում:
