Պակիստանում հայտնի աստվածաբան Թահիր Կադրին գլխավորել է իր հազարավոր կողմնակիցների բողոքի երթը։ Այն կոչվել է «Միլիոնների երթ»: Նրանք պահանջել են կառավարությունից բարեփոխել ընտրական համակարգը։
Ցուցարարները Լահոր քաղաքից ուղևորվել են մայրաքաղաք Իսլամաբադ։
Իշխանությունները հայտարարել են, որ մայրաքաղաքի կենտրոնում երթը չեն արտոնի։ Երթը հսկելու համար պատրաստվել է 10.000 ոստիկան։
Կադրին հորդորում է կառավարությանը մինչև ընտրությունները վերանայել ընտրական քաղաքականությունը։ Իշխանությունները աստվածաբանին մեղադրում են մայիսին նշանակված ընտրությունները հետաձգելու փորձի համար։ Նրանք զգուշացնում են, որ «Թալիբան» շարժման ներկայացուցիչները կարող են հարձակվել ցուցարարների վրա։
