Ուկրաինան պատրաստ է մասնակցել նոր համաշխարհային անվտանգության համակարգի ստեղծմանը: Այս մասին գերմանական ARD հեռուստա-ռադիոընկերության եթերում հայտարարել է Ուկրաինայի նախագահ Պյոտոր Պորոշենկոն:
Ուկրաինայի նախագահը նշել է, որ ինչպես իր երկիրը, այնպես էլ ամբողջ աշխարհը նոր պաշտպանական համակարգի ստեղծման կարիք ունեն, քանի որ գոյություն ունեցող կառույցները՝ ինչպես եվրոպական, այնպես էլ համաշխարհային, այլևս արդյունավետ չեն:
«Անվտանգության նոր համակարգը ուղղված կլինի ոչ թե ինչ-որ մեկի, այդ թվում Ռուսաստանի դեմ, այլ այն բանին, որպեսզի հնարավոր լինի պաշտպանել սեփական տարածքը, բացարձակապես անհասանելի դարձնել սահմանի խախտումները և ագրեսիան, արդյունավետ միջոցներ ունենալ խաղաղության պահպանման համար»,- ասել է Պորոշենկոն, որի խոսքերը մեջբերում է RIA Novosi-ն:
Ուկրաինայի նախագահը նշել է, որ ՆԱՏՕ-ն մնացել է համակարգ, որը կարող է ապահվել իր անդամների անվտանգությունը: Մեկնաբանելով այդ կազմակերպությանն անդամակցության հայտ ներկայացնելու հնարավորությունը՝ Պորոշենկոն ընդգծել է, որ հարցը դիմումների մեջ չէ, հարցն այն է, որ երկիրը բարեփոխումների կարիք ունի:
«Պետք է անել ամեն բան, որպեսզի երկրի քաղաքացիների եկամուտների և համախառն ներքին արտադրանքի մակարդակը, պաշտպանական համալիրում արված ներդրումների մակարդակը և զինված ուժերի մակարդակը համապատասխանեն այն չափանիշներին, որոնք գոյություն ունեն այն երկրների համար, որոնք ցանկանում են լինել ՆԱՏՕ-ի անդամ»,- նշել է նախագահը՝ հավելելով, որ վերջին չորս տարիները ցույց են տվել, որ Ուկրաինայի համար բլոկերից դուրս մոդելը սխալ է:
