Ամբողջ միջազգային հանրությունն ու պատասխանատու կազմակերպությունները աչալրջորեն հետևում էին հայկական խոցված ուղղաթիռի հետ կապված դեպքերի զարգացմանը: Այս մասին մեզ հետ զրույցում նշեց Արևելագիտության ինստիտուտի ավագ գիտաշխատող, թուրքագետ Վահրամ Տեր-Մաթևոսյանը:
«Մենք ականատես եղանք միայն ԱՄՆ կողմից այդ հայտարարությանը, որը ևս ցույց տվեց, որ նրանց հետևելը ունեցել է նման դրսևորում: Սա պետք է զգոնության կոչ լինի բոլորին, հատկապես Ադրբեջանին, որ նման անխոհեմ և միջազգային կոնվենցիաներն ու միջազգային նորմերը խախտելով՝ հեռու չեն կարող գնալ, և նման վարքագիծը դատապարտված է պարզապես»,- ասաց նա:
Հարցին, թե հնարավո՞ր է, որ ԵԱՀԿ Մինսկի խմբի համանախագահող մյուս երկրները ևս հանդես գան նման հայտարարությամբ, Տեր-Մաթևոսյանը պատասխանեց. «Իհարկե ցանկալի է, որ այդպես լինի: Դիվանագիտական հարաբերություններում կա կարծիք, որ պետք չէ անուններ հնչեցնել, բայց սա այդ դեպքը չէ, այստեղ պիտի հստակ անուններ նշվեն, որովհետև ապագայում նմանատիպ դրսևորումներ ևս կարող են լինել: Ուստի դրանց կանխումը պետք է հենց այսօր լինի»:
Անդրադառնալով Թուրքիայում լրատվամիջոցների ազդեցության խնդրին՝ նա ասաց. «Կար մի շրջան՝ 2002-2006 թթ., երբ Թուրքիայի կառավարությունը սերտորեն համագործակցում էր լրատվամիջոցների հետ՝ նպատակ ունենալով լուծել զինվորականների ու քեմալականների թուլացման խնդիրը: Իսկ երբ 2010-ին Էրդողանը հասավ իր նպատակին և սահմանադրության միջոցով էապես կրճատեց զինվորականության և քեմալականության ներկայացուցիչների դիրքերը, նա անցավ լրատվամիջոցներին: Այն, ինչ հիմա կատարվում է լրատվամիջոցների առումով, պարզապես աղաղակող է ոչ միայն Թուրքիայի հասարակության, այլև միջազգային հանրության համար: Այն սահմանափակումները, ազատազրկումները, գրաքննությունը, որ կա Թուրքիայում, կարծում եմ, վերջին անգամ նմանատիպ դրսևորումներ եղել են 1980 թվականին»:
Նրա խոսքով՝ այդ մասին են վկայում միջազգային կազմակերպությունների զեկույցների տվյալները:
«Վերջին տարիներին Թուրքիայի կառավարությանը հաջողվեց լրատվամիջոցներին իր վերահսկողության տակ վերցնել, ու դա արվեց ամենատարբեր միջոցներով, այդ թվում՝ հարկային ճնշումներով: Այսօր թուրքական լրատվամիջոցների 70 տոկոսը ուղղակի կամ անուղղակի կերպով գտնվում են կառավարության հետ առնչություն ունեցող բիզնես հոլդինգների մեջ»,- ընդգծեց թուրքագետը:
