Սիրիայում Բաշար Ասադի կառավարությունը, որին երկար տարիներ խստորեն քննադատում է Վաշինգտոնը, փորձում է ԴԱԻՇ-ի (Իրաքի և Շամի իսլամական պետություն) սպառնալիքն օգտագործել որպես ԱՄՆ-ի հետ հարաբերությունների նորմալացման միջոց: Stratfor վերլուծական բյուրոյի տեղեկությամբ՝ Դամասկոսը ԱՄՆ-ին նրա դաշնակիցների միջոցով ջիհադիստների դիրքերի վերաբերյալ հետախուզական տվյալներ է տրամադրում:
Սեփական աղբյուրներից ստացված տեղեկությանը հղում անելով՝ Stratfor-ը նկարագրում է սխեմա, որով գաղտնի տվյալները Դամասկոսից Վաշինգտոնում են հայտնվում: Սիրիայի կառավարությունը տվյալներն ուղարկում է իր համար դաշնակից Իրաքի իշխանություններին: Իր հերթին, Բաղդադը փաստաթղթերն ուղարկում է օվկիանոսից այն կողմ: Տրամադրված տեղեկությունը վերաբերում է Հալեպ, Ռաքքա և Դեյր-էլ Զոր նահանգներում իսլամիստների զենքի պահեստներին, մարզումների հրապարակներին և հրամանատարական կենտրոններին: Բացի դրանից՝ սիրիական հետախուզությունը տվյալներ է հայտնում «Խորասան» խմբավորման՝ «Ֆրոնտ ան-Նուսրա»-ի, Սիրիայում «Ալ-Քաիդայի» բաժանմունքի դիրքերի մասին:
Ըստ Stratfor-ի փորձագետների՝ գաղտնի միջնորդավորված տվյալների փոխանակման մոդելը ելնում է տարածաշրջանի բոլոր առաջատար խաղացողների շահերից: Սիրիան «կարդացել է Վաշինգտոնի մտքերը» ջիհադիստների դեմ պայքարում առաջնայնությունների վերաբերյալ և բոլոր ուժերով կօգտագործի առկա հետախուզական ռեսուրսները, որպեսզի դուրս գա Նահանգների հետ հարաբերությունների փակուղուց և թուլացնի քաղաքացիական պատերազմին Արևմուտքի ուղղակի միջամտության սպառնալիքը: Սեփական տվյալներ ունեցող ԱՄՆ-ին անհրաժեշտ է դրանց ստուգման լրացուցիչ աղբյուր՝ ԴԱԻՇ-ի դեմ ավելի արդյունավետ պայքարելու համար: Իսկ Ասադի հետ ուղղակի համագործակցությունը Բարաք Օբամայի վարչակազմի համար «քաղաքական դինամիտ» կլիներ:
Հնարավոր է՝ այդ պատճառներով ԱՄՆ-ը դեռ հրաժարվում է մասնակցել Իրաքի և Սիրիայի մասնակցությամբ հետախուզությունների եռակողմ խորհրդակցությանը: Բաղդադը, որը լավ հարաբերություններ ունի և՛ Վաշինգտոնի, և՛ Իրանի, և՛ Սիրիայի շիա կառավարությունների հետ, ձգտում է ամրապնդել այդ ուժերի միջև միջնորդի յուրահատուկ դիրքը: Իսկ Թեհրանը ողջունում է տեղաշարժն ԱՄՆ-ի քաղաքականության մեջ՝ բացառապես Ծոցի սուննի միապետությունների վրա կենտրոնացումից անցում տարածաշրջանում ուժերի հավասարակշռությունը պահելուն:
Ամերիկացի քաղաքական գործիչները խուսափում են Դամասկոսի հետ համագործակցության օգտին հրապարակավ հանդես գալուց: Սեպտեմբերին Ներկայացուցիչների պալատի միջազգային հարցերով կոմիտեի ղեկավար Էդ Ռոյսը հայտարարել է. «Սպառնալիքը գալիս է, մոտենում է: ԴԱԻՇ-ի գրոհայինների շարքում հազարավոր մարդիկ արևմտյան անձնագիր ունեն, հարյուրավորները՝ ԱՄՆ-ի անձնագիր»: Բայց կոնգրեսականն Ասադի կառավարությանը քննադատել է իրեն որպես ջիհադիստների միակ այլընտրանք ներկայացնելու փորձի համար, առաջարկել է սիրիական ընդդիմության մարտիկների ռազմական ուսուցում կազմակերպել:
