Թուրքական Sabah թերթի փոխանցմամբ, ամերիկյան հեղինակավոր Foreign Policy հանդեսը կազմել է «բեղավոր բռնակալների» ցանկը, որում հայտնվել են Ադոլֆ Հիտլերը, Իոսիֆ Ստալինը, Ֆրանկոն, ինչպես նաև Թուրքիայի Հանրապետության հիմնադիր Մուսթաֆա Քեմալ Աթաթուրքը, ինչը հարուցել է թուրքերի խոր զայրույթը:
Վեջինիս մասին նշված էր. «Աթաթուրքը երիտասարդ տարիներին «կայսերական բեղեր» էր պահում, ինչը Օսմանյան կայսրությունում գերմանական ուժեղ ազդեցության արդյունք էր»:
Ուշագրավ է, որ Աթաթուրքին նվիրված բաժնում հանդիպում ենք հետևյալ բառերին. «2002 թվականին իշխանության գալուց ի վեր` պետությունը դարձյալ գլխավորեց բեղավոր մարդը» (նկատի ունեն Էրդողանին.- 1in.am):
Հիշեցնենք, որ Թուրքիայում ամեն գնով պաշտպանում են «բոլոր թուրքերի հայր» Մուսթաֆա Քեմալին: Ավելին, գոյություն ունի նրա անձի պաշտպանության մասին օրենք:
Աթաթուրքի պաշտպանության մասին թիվ 5816 օրենքն ընդունվել է 1951-ի հուլիսի 25-ին և օրենքի ուժ ձեռք բերել հուլիսի 31-ին։ Այս օրենքի 1-ին հոդվածով Աթաթուրքի հիշատակը վիրավորող անձանց համար նախատեսվում է 1-3 տարվա ազատազրկում: 2-րդ հոդվածով նախատեսվում է այդ պատժաչափի համամասնական ավելացում, եթե հասարակական վայրերում իրենց այդպիսի բան են թույլ տվել երկու կամ ավելի անձինք: 5-րդ հոդվածի համաձայն էլ` այս օրենքի իրագործմամբ պետք է զբաղվի արդարադատության նախարարը:
