«Ես անձամբ շնորհակալ եմ բոլոր այն երկրներին, որոնք փորձեցին միջնորդել, ձայն բարձրացրին և տեսակետ հայտնեցին: Պահանջեցին թե խնդրեցին Ադրբեջանին՝ ուրիշ խնդիր, համենայն դեպս, հարազատների ցավին ու մեր ժողովրդի ցավին ականջալուր եղան»,- լրագրողների հետ զրույցում անդրադառնալով հայկական խոցված ուղղաթիռի շուրջ միջազգային արձագանքին՝ ասաց «Հանրապետություն» կուսակցության քաղխորհրդի նախագահ Արամ Զավենի Սարգսյանը, որն այսօր Սուրբ Սարգիս եկեղեցում մասնակցում էր զոհված օդաչուների հոգեհանգստյան արարողությանը:
Ինչ վերաբերում է հայկական կողմի պատասխանին, Արամ Սարգսյանն ընդգծեց, որ դա զոհվածների հիշատակը հարգելու և հիշատակին տեր կանգնելու ամենալավ ձևն էր. «Փառք ու պատիվ նրանց, գլուխ եմ խոնարհում նրանց բոլորի առաջ: Նրանք իրենց կյանքի գնով մեր բոլորի ինքնասիրությունն ու պատիվը բարձր պահեցին»:
«Առաջին լրատվական»-ի այն դիտարկմանը, թե Մինսկի խմբին փաստորեն չհաջողվեց լուծել խնդիրը և զոհվածների դիակները տարհանել, ինչի արդյունքում հայկական կողմը ստիպված եղավ ինքնուրույն գործել, և հարցին, թե սա ի՞նչ անդրադարձ կունենա Մինսկի խմբի հետագա գործունեության վրա, Ա․Սարգսյանը պատասխանեց. «Ընդհանրապես, ես կարծում եմ, որ Մինսկի խումբն այլընտրանք չունի: Դրա չգոյությունը ձեռնտու է Ադրբեջանին և ինչ-ինչ այլ երկրների: Ադրբեջանի դիրքորոշումն ինձ համար պարզ է, նրանք փորձում են այնտեղ Թուրքիային տեղավորել: Այստեղ բալանսավորում կա՝ թե՛ Միացյալ Նահանգների, թե՛ Եվրոպայի ներկայության: Դրա չգոյությունը լուրջ վտանգներ է պարունակում: Դժբախտաբար, վերջին շրջանում մամուլում միտումներ եմ տեսնում՝ Մինսկի դեմ տեսակետներ ասելու: Ինչ-որ բան ինչ-որ բանով փոխելու պարագայում պետք է նայես՝ ինչն ինչով ես փոխում, կա՞ փոխարինողը, թե՞ ոչ»:
Նրա դիտարկմամբ՝ Ադրբեջանը վաղուց է Մինսկի խմբից հրաժարվել, «այդ երկիրն ամեն ինչ անում է, որ հրաժարվի, որովհետև բանակցային գործընթացներում ազգերի ինքնորոշման իրավունքը՝ որպես գործոն, առաջ է գնում աշխարհով մեկ. դրա փայլուն օրինակ էր Հյուսիսային Ուելսի հանրաքվեն, նման միտումներ կան նաև Կատալոնիայի մասով: Փաստորեն, նոր պետությունների ձևավորումը փաստ է դառնում աշխարհով մեկ, և Ադրբեջանը մտավախություններ ունի, որ այս համատեքստում հերթը հասնելու է նաև Ղարաբաղին: Դա ինձ ոգևորում է: Ես կողմնակից եմ, որ Մինսկի խումբը գործի, ես այդ կառույցի գործունեությունն արդյունավետ եմ համարում: Համենայն դեպս Հայաստանի համար այդ գործունեությունն արդյունավետ է»:
«Ժառանգություն» կուսակցության փոխնախագահ Արմեն Մարտիրոսյանն էլ «Առաջին լրատվական»-ի հետ զրույցում ասաց, որ հայկական կողմը շատ ճիշտ է վարվել. տեսնելով, որ Մինսկի խումբը չի կարողանում լուծել հարցը, ինքն է քայլ ձեռնարկել: «Ինչպես Արցախն ազատագրելիս մենք որևէ միջազգային կազմակերպության հույսին չմնացինք, այս դեպքում ևս: Պարզ է, որ մենք մեր ուժերով պետք է տղաներին հետ բերեինք։ Հրաշալի կատարված գործողություն էր: Հայաստանում Զինված ուժերը հենց այն հենքն է, որ մեր հենասյունը պետք է պահի»:
Առավել մանրամասն՝ մեր տեսանյութում:
