ԱՄՆ նախագահ Բարաք Օբաման ամերիկյան ABC հեռուստաալիքին տված հարցազրույցում հայտարարել է, որ նախկին պետքարտուղար Հիլարի Քլինթոնը, որը Դեմոկրատական կուսակցության կողմից 2016թ. Ընտրություններում նախագահի գլխավոր թեկնածուներից մեկն է համարվում, կարող է հիանալի նախագահ դառնալ, հաղորդում է The Hill-ը:
Օբաման գովաբանել է Քլինթոնին և նրան հիանալի ապագայով մրցունակ թեկնածու է անվանել:
«Եթե նա որոշի մասնակցել նախընտրական քարոզարշավին, ապա կարող է մրցունակ թեկնածու լինել, և ենթադրում եմ, որ նա հիանալի նախագահ կլինի»,- կարծում է երկրի ղեկավարը:
Դրանից բացի՝ Օբաման բարձր է գնահատել Քլինթոնի աշխատանքը պետապարատում՝ նրան «ականավոր պետքարտուղար» և «իսկական ընկեր» անվանելով:
Նա նշել է նաև, որ Հիլարի Քլինթոնի վերաբերյալ դրական արձագանքները հարկավոր է հարյուրտոկոսանոց երաշխիք համարել, որ նախկին պետքարտուղարը կառաջադրվի գալիք նախագահական ընտրություններում:
«Ես չեմ ցանկանում իրադարձություններից առաջ ընկնել. նա դեռ չի հայտարարել նախընտրական քարոզարշավին մասնակցելու մասին»,- ընդգծել է նախագահը:
Բարաք Օբաման ավելացրել է նաև, որ ԱՄՆ Դեմոկրատական կուսակցությունում մի քանի այլ թեկնածուներ էլ կան, ովքեր ի վիճակի են զբաղեցնել երկրի ղեկավարի պաշտոնը, սակայն չի նշել նրանց անունները:
«Ես շահագրգռված եմ, որպեսզի ինձ փոխարինի Դեմոկրատական կուսակցության թեկնածուն: Ես ինձանից կախված ամեն ինչ կանեմ, որպեսզի դեմոկրատների առաջադրած ցանկացած թեկնածու հաջողություն ունենա»,-հայտարարել է Օբաման:
