Երգչուհի Քեթի Փերիի համբերությունն արդեն հատել է. նա այլևս չի դիմանում պապարացիների հետապնդումներին: Մի քանի ժամ առաջ Twitter-ի իր էջում նա հուզական հաղորդագրություն է հրապարակել՝ իր և լուսանկարիչների հարաբերությունների թեմայով:
Բանն այն է, որ Քեթին Ավստրալիա է ժամանել Prismatic World Tour իր համերգային շրջագայության շրջանակներում: Նա միամտորեն կարծել է, թե ելույթներից հետո հանգստյան օրերին կարող է հանգստանալ տեղի լողափին: Սակայն 30-ամյա երգչուհին շրջապատվել է պապարացիներով, որոնց ուրախացրել էր երգչուհուն բիկինիով լուսանկարելու հնարավորությունը:
Փերին ավստրալական ԶԼՄ-ների ներկայացուցիչներին գրել է. «Ավստրալական մամուլ, դուք պետք է ամաչեք ձեր տաբլոիդների մշակույթի և պապարացիների համար: Ձեր պապարացիները չունեն ո՛չ հարգանք, ո՛չ պատիվ, ո՛չ խառնվածք: Ոչ մի մարդասիրություն:
Այսօր ինձ մի խումբ տղամարդիկ էին հետապնդում, երբ ես փորձում էի հանգիստ զբոսնել լողափով: Չնայած իմ խնդրանքներին՝ նրանք ինձ հանգիստ չէին թողնում:
Անցորդները կանգնում և փորձում էին ինձ օգնել, սակայն պապարացիները շարունակում էին լուսանկարել և ծիծաղել ինձ վրա: Նրանք ինձ առաջարկեցին «գործարք» կնքել՝ եթե ես թույլ տայի նրանց ինձ լուսանկարել լողազգեստով, նրանք ինձ հանգիստ կթողնեն:
Դա զզվելի և սարսափելի վարքագիծ է, և դրա հետ չի կարելի հաշտվել՝ հատկապես, երբ մարդը չի ուզում լուսանկարվել: Ես երբեք պապարացիների հետ գործարքի չեմ գնա և ընկերություն չեմ անի նրանց հետ, ովքեր աջակցում են նմանատիպ վարքագիծը»,- գրել է Փերին:
