Այսօր արդեն երկրորդ անգամ ՀՀ գլխավոր դատախազ Գևորգ Կոստանյանի նախաձեռնությամբ հանդիպում է տեղի ունեցել Մարտի 1-ի զոհերի հարազատների հետ: Նախորդ անգամ ծնողները գլխավոր դատախազին, արդեն իրենց նախաձեռնությամբ, հանդիպել էին նոյեմբերի 6-ին, որի ժամանակ Կոստանյանն ասել էր, որ գործը փակված չէ, քննություն է կատարվում: Նաև խոստացել էր զբաղվել զոհերի հարազատներին փոխհատուցում տրամադրելու հարցով:
Իսկ այսօր մոտ մեկ ժամ տևած հանդիպումից հետո ծնողները չեն ցանկացել մանրամասներ հայտնել հանդիպման մասին՝ հայտարարելով, թե չեն ցանկանում հարպարակել խոսակցության բովանդակությունը:
Բելգիայում գտնվող Ալլա Խաչատրյանն «Առաջին լրատվական»-ի հետ զրույցում ասաց, որ չի կարող ասել, թե ինչով է պայմանավորված գլխավոր դատախազի այս հետաքրքրությունը, բայց առանձնապես սպասելիքներ չունի նման հանդիպումներից: «Ես շատ ուրախ կլինեմ, որ նրանք պատրաստակամ լինեն բացահայտելու Մարտի 1-ի սպանդը, բայց ես հենց սկզբից էլ ասել եմ, որ չեմ հավատում, թե Սերժ Սարգսյանի, որը Մարտի 1-ի առաջին պատասխանատուներից է, նշանակած կադրը հանկարծ Մարտի 1 բացահայտի: Գուցե Սերժ Սարգսյանը չլինի, ու Կոստանյանը մնա և բացահայտի, բայց այս իշխանությունների օրոք Մարտի 1-ի բացահայտումը բացառված է»,- ասաց տիկին Ալլան՝ հավելելով, որ այս հանդիպումները ընդամենը իմիտացիա են, Կոստանյան-Աղվան Հովսեփյան հակամարտությունների շրջանակում բացատրվող երևույթ:
«Անգամ մեծ ցանկության դեպքում, եթե ներքուստ էլ շատ ուզենա, ինքը չի կարողանա, իրեն չեն թողնի, որ Մարտի 1 բացահայտի: Կոստանյանը պարզապես ուզում է ցույց տալ, որ ինքն ավելի լավ է աշխատում, քան Աղվան Հովսեփյանը: Չգիտեմ, իրենք ինչ պայմանավորվածություններ ունեն, բայց ես անձամբ չեմ հավատում այս խաղերին: Մարտի 1-ը չի բացահայտվի այնքան ժամանակ, քանի դեռ իշխանափոխություն տեղի չի ունեցել»:
Հիշեցնենք, որ Կոստանյանի հետաքրքրությունը Մարտի 1-ի գործի նկատմամբ մեծացավ հատկապես վերջերս Աղվան Հովսեփյանի այն հայտարարությունից հետո, թե Մարտի 1-ը բացահայտված է: «Մարտի 1-ի գործով բացահայտվել են բազում դրվագներ, մի շարք անձինք դատապարտվել են, և նրանցից որևէ մեկի դատավճիռը չի փոխվել որևէ դատական ատյանում։ Իհարկե, կան առանձին չբացահայտված հանգամանքներ, որոնցում կան լուրջ խոչընդոտներ հենց տուժողների կողմից»,- ասել էր Աղվան Հովսեփյանը: Դրանից անմիջապես հետո Կոստանյանը սկսեց նախաձեռնել այս հանդիպումները:
