ՌԴ տնտեսական ճգնաժամն ու իշխանությունների կտրուկ միգրացիոն քաղաքականությունը կմեծացնեն միգրանտների արտահոսքը ՌԴ-ից: Այս մասին «Ռեգիոն» հետազոտական կենտրոնի նախաձեռնությամբ կազմակերպված մամլո ասուլիսի ընթացքում, ի պատասխան «Առաջին լրատվական»-ի հարցի, ասաց ռուսմարդաբան, ներկայումս միգրացիայի և իսլամի խնդիրներով զբաղվող պրոֆեսոր Սերգեյ Աբաշինը՝ անդրադառնալով Ռուսաստանի շուրջ առկա քաղաքական գործընթացներին և միգրանտների հոսքերի վրա տնտեսական ճգնաժամի հնարավոր ազդեցությանը:
Նա նշեց, որ տնտեսական ճգնաժամի ազդեցությունը միգրացիոն հոսքերի վրա գնահատելու համար անհրաժեշտ է հասկանալ, թե դեռ որքան կշարունակվի, որքան խոր կլինի ճգնաժամն ու տնտեսության որ ճյուղերին հատկապես կվնասի: Ըստ նրա՝ այս պահին հստակ գնահատել հնարավոր չէ, թեև, նրա խոսքով, արդեն 2014թ. տվյալները ցույց են տալիս, որ Ռուսաստանից Միջին Ասիա դրամական տրանսֆերտներն են պակասում, միգրացիոն հոսքերն են կրճատվում, ինչպես, օրինակ, Ուզբեկստանից՝ համարյա 10%-ով:
«Այս հարցում իհարկե գործում է ոչ միայն տնտեսական ճգնաժամը, այլև ավելի կտրուկ քաղաքականությունը, որը վարում է ՌԴ-ն՝ սահմանափակելու համար միգրացիոն հոսքերը: Եթե ճգնաժամը և այսպիսի քաղաքականությունը պահպանվեն ու ավելի ամրապնդվեն, ապա պետք է սպասել ավելի մեծ արտահոսք Ռուսաստանից: Թեև ես չեմ կանխատեսում, որ մոտ ապագայում տեղի կունենա միգրանտների ամբողջական վերակողմնորոշում դեպի այլ երկրներ, ավելի հնարավոր է, որ միգրանտներն ակտիվ կերպով ՌԴ տնտեսությունում նոր տեղեր գրավեն:
Ամեն դեպքում ինչ-որ տնտեսություն պահպանվելու է, ուստի միևնույն է՝ անհրաժեշտ են լինելու աշխատող ձեռքեր, աշխատանքի շուկայում ամեն դեպքում օտարերկրյա աշխատողների մի զգալի մասը կշարունակի պահաջարկ վայելել»,- մեկնաբանեց Սերգեյ Աբաշինը: Նա ասաց, որ սովորաբար շատ քիչ են նկատում գործազրկություն օտարերկրացիների շրջանում, այն օտարերկրացիների, որոնք ՌԴ են եկել աշխատելու համար, քանի որ, Աբաշինի խոսքով, եթե աշխատանքային միգրանտները կորցնում են իրենց աշխառտանքը, իրենք իրենց կամքով լքում են երկիրը և սկսում աշխատանք փնտրել կա՛մ սեփական երկրում, կա՛մ այլ երկրներում:
Սերգեյ Աբաշինը նաև պարզաբանեց, թե ինչպես կփոփոխվեն միգրացիոն հոսքերը Հայաստանից դեպի Ռուսաստան, երբ Հայաստանը միանա Եվրասիական տնտեսական միությանը: Աբաշինը նշեց, որ ՌԴ Միգրացիոն դաշնային ծառայության վերջին երկու տարվա տվյալների համաձայն՝ ՌԴ-ում մշտական գտնվում է շուրջ կես միլիոն ՀՀ քաղաքացի՝ չհաշված ՌԴ քաղաքացիություն ստացած ազգությամբ հայերին, որը բավականին կայուն մակարդակ է: «Ինձ թվում է, որ ԵՏՄ անդամակցությունը և կացության հարցում որոշակի դյուրացումները չեն հանգեցնի հոսքի էական աճի Հայաստանից: Կարելի է խոսել այն մասին, որ տնտեսական ճգնաժամի պայմաններում լեգալացման նոր հնարավորությունները թույլ չեն տա, որ միգրանտների թիվը մեծապես նվազի»,- ասաց նա:
Միգրացիոն փորձագետը բացատրեց նաև, թե ինչու է ՌԴ-ի միգրացիոն քաղաքականությունն այդքան ագրեսիվ: «ՌԴ ներկայիս իշխանությունները որոշել են գործիքավորել միգրանտատյացությունը և քսենոֆոբիան պոպուլիստական տրամադրություններով և կարգախոսներով մանիպուլացնելու նպատակով: «Այցելուի» և «օտարի» իմիջը ձեռնտու է շատ քաղաքական գործիչներին, քանի որ նրանց կարելի է վերագրել բոլոր խնդիրներն ու դժվարությունները, նրանց ուղղել հասարակական դժգոհությունները: Դրան գումարած՝ միգրանտները մարդիկ են անորոշ իրավական կարգավիճակով, մշտապես ճնշումների տակ նրանք իդեալական են նման գործողությունների համար»,- ասաց Սերգեյ Աբաշինը:
