Facebook-ի առաջին դիզայներ և սոցցանցի հիմնադիր Մարկ Ցուկերբերգի մտերիմ ընկեր Աարոն Սիթիգը լքում է ընկերությունը` հաղորդում է The Wall Street Journal-ը:
Սիթիգը Facebook-ի առաջին աշխատակիցներից է: Նրան 2005թ. աշխատանքի էր ընդունել սոցցանցի նախկին նախագահ Շոն Փարկերը: Ժամանակի ընթացքում նա դարձել էր Ցուկերբերգի մտերիմը:
Սիթիգը Facebook-ում ղեկավարել է հայտնի Like կոճակի ստեղծման գործընթացը, ինչպես նաև առաջարկել է ներմուծել լուսանկարներին ընկերների անունները նշելու սովորույթը` գրում է WSJ-ը:
Հատկանշական է, որ նա սոցցանցից արդեն 2-րդ անգամ է հեռանում: 2011թ. նա վերադարձավ «դիզայնի ռազմավարության ղեկավարի» կարգավիճակով:
Սիթիգի հեռանալու ու հետագա պլանների մասին ոչինչ չի հաղորդվում:
