Սիրիայի հարցով ՄԱԿ-ի և ԱՊԼ-ի հատուկ պատվիրակ Լախդար Բրահիմին խոստովանել է, որ BBC-ի հետ հարցազրույցի ժամանակ Ասադի ելույթն իր կողմից «աղանդավորական» որակելը սխալ էր: Reuters գործակալության հետ զրույցում նա ներողություն է խնդրել իր արտահայտության համար:
Բրահիմին նշել է նաև, որ չի տեսնում Ասադին՝ որպես անցումնային կառավարության մաս: Նրա խոսքերով՝ Ժնևում համաձայնեցված պլանը մնում է սիրիական իրադրության կարգավորման միակ տարբերակը: «Որոշումը չի կարող սպասել մինչև 2014 թվականը, այն պետք է ընդունվի այս տարի»,- ասել է Բրահիմին:
Ավելի վաղ Բրահիմին հայտարարել էր, որ Դամասկոսում կողմնակիցների առջև Ասադի ելույթը ոչնչով չէր տարբերվում նախորդներից: «Հավանաբար, դա ավելի աղանդավորական էր և միակողմանի»,- հավելել էր նա:
BBC-ի հետ հարցազրույցում Բրահիմին ասել էր նաև, որ Ասադների ընտանիքի իշխանությունը Սիրիայում չափազանց երկար է տևել:
Հիշեցնենք, որ Բաշար Ասադի հայրը՝ Հաֆեզ Ասադը, իշխանության էր եկել 1970 թվականին, հեղաշրջման արդյունքում:
«Կարծում եմ՝Սիրիայում փոփոխությունների ժամանակն է եկել, և նախագահ Բաշար Ասադը պետք է պատասխանի ժողովրդի պահանջներին, այլ ոչ թե դիմակայի»:
Ինչպես նշում են փորձագետները՝ սա Բրահիմիի առաջին հայտարարությունն է, որում նա արտահայտվել է Ասադի հեռանալու անհրաժեշտության մասին, ինչից բանագնացը նախկինում խուսափում էր:
