Անարխիստները, որոնք երեքշաբթի լույս չորեքշաբթի գիշերը գրավել էին Հունաստանի մայրաքաղաք Աթենքի կենտրոնում գտնվող լքված շինությունը, ձերբակալված են: Այս մասին հաղորդում է RIA Novosti-ն՝ վկայակոչելով Հունաստանի ոստիկանությանը: Ձերբակալվածների թիվը չի հստակեցվել:
«Ամալյա առանձնատուն» անվամբ շինության շուրջ հակամարտությունը շարունակվում է վերջին մի քանի շաբաթների ընթացքում: Մինչ այդ նեոդասական առանձնատունը անարխիստները շուրջ 20 տարի օգտագործում էին որպես ոչ պաշտոնական գրասենյակ:
2012 թ. դեկտեմբերին ոստիկանությունն անարխիստներին վտարել է շինությունից՝ ձերբակալելով 8 մարդու:
Ոստիկանության հայտարարության համաձայն՝ շինությունում այդ ժամանակ հայտնաբերվել է 1500 դատարկ շիշ, «Մոլոտովի կոկտեյլ» պատրաստելու համար խառնուրդները, դիմակներ և դանակներ:
Սակայն հունվարի լույս 9-ի գիշերը շուրջ 80 մարդկանցից բաղկացած մի խումբ անարխիստներ կրկին հարձակվել էին շինությունը հսկող ոստիկանների վրա և գրավել այն: Այս անգամ ոստիկանությունից մի քանի ժամ է պահանջվել անարխիստներին շենքից վտարելու համար:
