Microsoft ընկերությունը, որը Bing որոնողական համակարգի ստեղծողն է, մեղադրել է Google-ին որոնողական շուկան մոնոպոլացնելու մեջ` պաշտոնական բողոք ուղարկելով Եվրահանձնաժողով: Այս մասին տեղեկացնում է ընկերության պաշտոնական բլոգը:
Microsoft-ում կարծում են, որ Google-ը միտումնավոր օգտագործում է շուկայում իր գերակա դիրքը` մեծ վնաս հասցնելով շուկայի մյուս խաղացողներին: Մասնավորապես նշվում է, որ Google-ը ոչ կոռեկտ է ինդեքսավորում իր հակառակորդների կայքերը և միտումնավոր խեղաթյուրում է որոնման արդյունքերը` առաջ մղելով իր գործընկեր կազմակերպությունների կայքերը:
Google-ին մեղադրում են նաև նրանում, որ ընկերությունն իր մրցակիցների համար չի ապահովում իր սեփական սերվերների՝ օրինակ` YouTube-ի հասանելիությունը, արդյունքում, ըստ Microsoft-ի, մրցակցող որոնողական համակարգերը չեն կարողանում ամբողջությամբ ցույց տալ հղումները Google-ի համակարգի բոլոր կայքերի պարունակությանը, ինչը հանգեցնում է այլ որոնողական համակարգերից օգտատերերի արտահոսքին դեպի Google:
Microsoft-ի բողոքը կդառնա մասը Google-ի դեմ անցկացվող քննության, որը սկսվել է 2010 թ.: Այն ժամանակ առաջատար որոնողական համակարգի դեմ հայցով էին հանդես եկել երեք եվրոպական ընկերություններ, որոնցից մեկը պատկանում է Microsoft-ին:
Նախնական հակամենաշնորհային քննությունը Google-ի դեմ Եվրահանձնաժողովում սկսվել է 2010թ. փետրվարին: Նոյեմբերին պարզ է դարձել, որ հակամենաշնորհային հանձնաժողովը լայնածավալ քննություն է սկսել՝ Google-ի աշխատանքի մեջ հայտնաբերելով ոչ ազնիվ մրցակցության տարրեր:
