Գալիք նախագահական ընտրություններում երկրորդ տեղի համար պայքարը գնալու է «Ժառանգություն» կուսակցության ղեկավար Րաֆֆի Հովհաննիսյանի և «Ազատություն» կուսակցության ղեկավար Հրանտ Բագրատյանի միջև. նրանք կանցնեն 10 %-ը: ՀՀ նախագահի այլ թեկնածուները նրանց չեն էլ մոտենա իրենց վարկանիշով: Այս մասին «Առաջին լրատվական»-ի հետ զրույցում ասաց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը:
Նա նշեց, որ ամբողջ խնդիրը հետևյալն է, թե այս երկու թեկնածուներից ում կանցնեն ԲՀԿ-ի ձայները՝ Րաֆֆի Հովհաննիսյանի՞ն, թե՞ Հրանտ Բագրատյանին: Ըստ սոցիոլոգի՝ միանշանակ է, որ ՀԱԿ առաջնորդ, ծայրահեղ արմատական ընդդիմությունը ներկայացնող Լևոն Տեր-Պետրոսյանի ձայները կանցնեն Հրանտ Բագրատյանին՝ որպես արմատական ընդդիմություն: Սակայն, ըստ Ադիբեկյանի, կենտրոնամետ ընդդիմության ձայները հարցականի տակ են:
«Նրանք պատրաստ էին ձայները տալ ԲՀԿ առաջնորդ Գագիկ Ծառուկյանին, իսկ հիմա մենք դեռ չգիտենք՝ վերջնական որոշումն իրենք ինչպես են կայացնելու, գնալո՞ւ են ընտրության։ Եթե գնալու են, ո՞ւմ են նախընտրելու»,- ասաց Ահարոն Ադիբեկյանը:
Նրա համոզմամբ՝ այս տարի «Ժառանգություն» կուսակցության ղեկավար Րաֆֆի Հովհաննիսյանն իր անձնական վարկանիշով գերազանցում է Հրանտ Բագրատյանին: «Բայց բացի անձնական վարկանիշից, կա նաև կուսակցությունը: Խնդիրն այն է, թե Րաֆֆիին «Ժառանգությո՞ւն»-ը շատ ձայն կբերի, թե՞ Բագրատյանը՝ ՀԱԿ-ով կամ «Հանրապետություն» կուսակցությամբ»,- նկատեց նա:
Տեղեկացնենք, որ «Սոցիոմետր» սոցիոլոգիական կենտրոնը հունվարի 23-ին կներկայացնի իրականացվելիք հարցումների արդյունքները՝ թե ով ինչ ներուժ ունի, ով ինչ հնարավորություն ունի, կարո՞ղ է դա պահպանել մինչև ընտրությունները, թե՞ ոչ:
