Ամերիկյան վարչակազմը դիտարկում է 2014-ից հետո Աֆղանստանից իր զորակազմը լիովին դուրս բերելու հնարավորությունը: Այս մասին հայտարարել է Անվտանգության հարցերով ԱՄՆ նախագահի խորհրդականի տեղակալ Բեն Ռոդսը` հայտնում է RIA Novosti-ն:
Ավելի վաղ Wall Street Journal-ը, հղում անելով սեփական աղբյուրներին, հաղորդել էր, որ Պենտագոնը նախապես որոշել է զորակազմի հիմնական մասը 2014-ի վերջին դուրս բերելուց հետո 3-9 հազար զինծառայող թողնել Աֆղանստանում՝ երկրի զինուժի մարզման և ԱՄՆ ներկայացուցչությունների պահպանման համար: Դա մի քանի հազարով պակաս է, քան նախկինում ենթադրվում էր:
Դեռևս 2012-ի կեսերին ամերիկյան վարչակազմը նախատեսում էր Աֆղանստանում պահպանել 6-15 հազարանոց ռազմական ներկայություն:
Ծրագրերի ուղղումը տեղի է ունեցել Պենտագոնի ղեկավարի պաշտոնում նախկին սենատոր Չակ Հեյգելի թեկնածության առաջադրմանը զուգահեռ: Վերջինս Աֆղանստանից ամերիկյան ուժերի շուտափույթ դուրսբերման կողմնակից է:
Այս ուրբաթ Սպիտակ տանը տեղի կունենա ԱՄՆ նախագահ Բարաք Օբամայի և Աֆղանստանի նախագահ Համիդ Քարզայի հանդիպումը: Նրանք կխոսեն երկու երկրների ռազմավարական համագործակցության ուղղության մասին: Ռոդսը նշել է, որ Աֆղանստանում պահպանվելիք զորակազմի թվաքանակի հարցը նրանց հանդիպման գլխավոր թեման չէ: Այդ մասին պետության ղեկավարը վերջնական որոշում կկայացնի մի քանի ամսից:
