«Հարթակի գլխավոր դերակատարը Գագիկ Ծառուկյանն է, Գագիկ Ծառուկյանն է կազմակերպում, Գագիկ Ծառուկյանն է որոշումներ կայացնում, մյուսներն էլ, ըստ իրենց տրված խոսքի իրավունքի, արտահայտվում են»,- «Առաջին լրատվական»-ի հետ զրույցում նման տեսակետ հայտնեց ԳԽ պատգամավոր Ազատ Արշակյանը:
Նրա խոսքերով՝ Ծառուկյանի վերցրած դադարի համար նույնիսկ կարելի է լավն ասել․ «ՀՀ հիմնադիր նախագահը կա, անկախություն հայտարարողը կա, Ղարաբաղն ազատագրողը կա, իսկ Հայաստանի ժողովրդավարացնողը չկա: Այս խոռոչը բաց է մնացել»,- ընդգծեց նա:
Ազատ Արշակյանի դիտարկմամբ՝ Սերժ Սարգսյանը եռյակի հետ շախմատ է խաղում․ «Նա ճիշտ քայլ է արել, ասում է՝ եկեք միասին անենք, քաղաքականացնում է իշխանություն-ոչ իշխանություն հարաբերությունները: Ամեն անգամ երբ ասում են՝ հեռացիր, հիմա երբ ես հեռանամ՝ ումի՞ց եք պատասխան եք ստանալու, ո՞վ է լինելու: Միևնույն է, մի քանի տարի հետո նա հեռանալու է: Ես կարծում եմ, որ սա նրա կողմից շախմատային քայլ էր, այնտեղից էլ շախմատ խաղացին»: