ԱԺ ՀՀԿ խմբակցության պատգամավոր Լեռնիկ Ալեքսանյանը «Ժառանգություն» խմբակցության ղեկավար Ստեփան Սաֆարյանի հետ բանավեճի ժամանակ այսօր հայտարարեց, թե Րաֆֆի Հովհաննիսյանի հացադուլը լուծեց իր խնդիրը: Միայն թե, ըստ Ալեքսանյանի, այն կատարեց կուսակցության քաղաքական նպատակները, այն է՝ «Ժառանգությունն» իր վրա բևեռեց հասարակության ուշադրությունը: ՀՀԿ-ական պատգամավորը նաև հայտարարեց, թե ինքը չի ընդունում հացադուլը:
«Ինչո՞ւ չեմ ընդունում այդ մեթոդը. սովորաբար հացադուլ անում են հուսահատված այն մարդիկ, ում համար դա բողոքելու վերջին միջոցն է»,- նշեց նա:
Սրան ի պատասխան՝ Ստեփան Սաֆարյանը նշեց.
«Այս երկու շաբաթվա ընթացքում մի շատ էական բան տեղի ունեցավ, այն քսան հազարից ավելի մարդիկ, ովքեր եկան Ազատության հրապարակ ու զորակցեցին, այն հեռագրերն ու զանգերը, որոնք ստացվեցին, հիրավի մի բան ասացին. «Դուք մեկ ձայնի մեջ ամփոփեցիք մեր բողոքը, և մենք կանգնած ենք այդ բողոքի կողքին»: