Շոտլանդիայում մուսուլմանական ընտանիքներում տիրող բռնության դեմ ակցիա կկազմակերպվի։ Այս մասին գրում է BBC News-ը։
Մուսուլման կանանց Amina բարեգործական կազմակերպության կողմից նախաձեռնված այս ակցիան կկրի You Can Change This («Դու կարող ես փոխել սա») անվանումը։ Միջոցառումը պաշտոնապես կմեկնարկի փետրվարին՝ Գլազգոյում և Էդինբուրգում։
Amina-ն Շոտլանդիայի բոլոր մուսուլմաններին հորդորում է հայտնել իրենց ընտանիքներում կատարվող բռնությունների մասին։ Ըստ նրանց՝ շատ հոգևորականներ ճիշտ չեն մեկնաբանում իսլամի հիմունքները և դրանով արդարացնում են բռնությունը։ Amina-ն դրա կապակցությամբ կազմակերպելու է մուսուլման հոգևորականների դասախոսություններ և քարոզներ՝ բացատրելու համար, որ պետք չէ աղավաղել իսլամի պատգամները, և որ կնոջ նկատմամբ բռնությունն իսլամը չի ողջունում։
Amina-ի ակտիվիստ Սմինա Աքհթարը պատմում է, որ իրենց թեժ գծին զանգահարում են շատ մուսուլման կանայք և բողոքում, որ ամուսնինները ծեծում են իրենց՝ դա արդարացնելով Ղուրանին արված հղումներով։ Այդ կանայք հաճախ չեն տիրապետում իսլամի հիմունքներին և չեն կարողանում առարկել ամուսիններին։ Amina-ի նպատակն է հենց կանանց լուսավորելը և կրոնի դրույթներին հանգամանալից ծանոթացնելը։
Amina կազմավորվել է 1997-ին՝ Շոտլանդիայի մուսուլմանական համայնքների ներկայացուցիչներից։ Այն գրասենյակներ ունի Գլազգո և Դանդի քաղաքներում։ Կազմակերպության հիմնական նպատակը մուսուլման կանանց խնդիրների մասին բարձրաձայնելն է ու նրանց նկատմամբ խտրական վերաբերմունքի դեմ պայքարելը։
Շոտլանդիայում բնակվում է 40 000 իսլամադավան քաղաքացի, որն ամբողջ բնակչության մեկ տոկսից էլ քիչ մասն է կազմում։ Չնայած դրան՝ մուսուլմանները մեծությամբ երկրորդ կրոնական խումբն են երկրում։
