Ամերիկյան դերասանուհի և երգչուհի Բեթ Միդլերը կվերադառնա Բրոդվեյ ՝ գրեթե 30-ամյա դադարից հետո և կխաղա I’ll Eat You Last: A Chat with Sue Mengers («Ես քեզ վերջինը կուտեմ. Զրույց Սյու Մենջերսի հետ») մոնոներկայացման մեջ: Ինչպես ArtsBeat բլոգում հաղորդում է The New York Times պարբերականը՝ նա կկատարի հայտնի հոլիվուդյան գործակալ Սյու Մենջերսի դերը, ով մահացել է 2011 թվականին:
Մենջերսը չափից ավել հաջողակ է եղել արդյունաբերության ոլորտում, որտեղ հիմնականում աշխատում են տղամարդիկ: Նա իր կարիերան սկսել է MCA գործակալությունում քարտուղարուհու պաշտոնից, իսկ 1960-ական թթ. աշխատանքի է տեղավորվել CMA-ում (հետագայում ICM Partners), որն առաջ էր մղում Փոլ Նյումանի, Սթիվ Մաքքուինի, Ռոբերտ Ռեդֆորդի շահերը: Մինչև 1980-ական թթ. այնտեղ աշխատած Մենջերսի հաճախորդներն են եղել Բարբարա Սթրեյզանդը, Փիթեր Բոգդանովիչը, Շերը, Ջոան Քոլինզը, Բրայան Դե Պալման, Բոբ Ֆոսսը, Սիդնի Լյումեթը և այլ դերասաններ, պրոդյուսերներ ու սցենարիստներ:
Բեմադրված պիեսի հեղինակը Ջոն Լոգանն է, ով Ջեյմս Բոնդի մասին վերջին ֆիլմի համահեղինակն է: Ռեժիսորը Ջո Մանտելոն է:
Միդլերի մասնակցությամբ ներկայացման պրեմիերան նշանակված է ապրիլի 24-ին:
