ԱՄՆ նախագահ Բարաք Օբաման հայտարարել է ԱՄՆ պաշտպանության նախարարի պաշտոնում հանրապետական նախկին սենատոր Չակ Հեյգելի թեկնածության և Կենտրոնական հետախուզության վարչության ղեկավարի պաշտոնում ահաբեկչության հարցերով իր օգնական Ջոն Բրեննանի թեկնածության առաջադրման մասին: Սպիտակ տանը ելույթ ունենալով՝ Օբաման վստահություն է հայտնել, որ այդ երկու քաղաքական գործիչները կկարողանան դիմակայել ազգային անվտանգությանն ուղղված մարտահրավերներին:
Եթե 66-ամյա Հեյգելի թեկնածությունն ԱՄՆ Կոնգրեսը հաստատի, ապա նա Պենտագոնում կփոխարինի Լեոն Պանետտային: Հանրապետական սենատորին այս պաշտոնում առաջադրելն ավելի շատ սիմվոլիկ բնույթ ունի և պետք է ապացուցի ընդդիմադիր ուժերի ներկայացուցիչների հետ համագործակցելու Օբամայի պատրաստակամությունը:
57-ամյա Բրեննանի թեկնածությունը ևս պետք է հաստատվի Սենատի կողմից: Հաստատումից հետո նա այդ պաշտոնում կփոխարինի Դևիդ Պետրեուսին, ով անցյալ տարի ամուսնական անհավատարմության պատճառով բարձրացած սկանդալի հետևանքով հրաժարական տվեց:
