Թուրքական Star թերթի փոխանցմամբ, վարչապետ Էրդողանն Իրաքից վերադառնալիս օդանավում պատասխանել է թուրք լրագրողների հարցերին:
Էրդողանն անդրադարձել է Փարիզում Տնտեսական համագործակցության և զարգացման կազմակերպության (OECD) Թուրքիայի մշտական ներկայացուցչի պաշտոնում պոլսահայ տնտեսագետ Տարոն Աջեմօղլուի նշանակմանը.
«Մենք մեր քաղաքացիներին «չենք տարանջատում»` ըստ ազգային պատկանելիության: Մենք բարձր ենք գնահատում ԱՄՆ-ում դասավանդող մեր ընկերոջը:
Նրան հրավիրեցինք և հանդիպեցինք: Մենք հավատում ենք, որ նա կարող է ամենալավ ձևով ներկայացնել մեր երկիրը: Աջեմօղլուն մեզ հայտնեց, որ այժմ աշխատում է գիտական թեմայի վրա, որի ավարտից հետո կլինի մեր տրամադրության տակ»:
Հիշեցնենք, որ նախ թուրքական լրատվամիջոցները տեղեկատվություն տարածեցին, թե Աջեմօղլուին առաջարկվել է Ֆրանսիայում Թուրքիայի դեսպանի պաշտոնը, սակայն ավելի ուշ պարզվեց, որ խոսքը Փարիզում Տնտեսական համագործակցության և զարգացման կազմակերպության (OECD) Թուրքիայի մշտական ներկայացուցչի պաշտոնի մասին է: