Ճապոնիայի Ֆուկուսիմա պրեֆեկտուրայում, որտեղ տեղի է ունեցել ատոմակայանի վթարը, մեծացել է անթույլատրելի աղտոտվածության շառավիղը: Այս մասին հաղորդում է NHK հեռուստաալիքը: ՄԱԳԱՏԵ-ն հայտնաբերել է, որ Իինատե գյուղում, որը գտնվում է ատոմակայանից 40 կմ հեռավորության վրա, նկատվել է ճառագայթման ֆոնի՝ նորմայից երկու անգամ գերազանցում: Այս մասին միջազգային այդ կազմակերպության ներկայացուցիչները հայտնել են Ճապոնիայի կառավարությանը:
Այս պահին տարհանումն իրականացվում է ատոմակայանից 20-30 կմ շառավիղով: 40 կմ վրա ճառագայթման ավելացման մասին է հայտնել նաև Ճապոնիայի կառավարության գլխավոր քարտուղար Յուկիո Էդանոն` նշելով, որ այդպիսի տվյալներ իրենք էլ են ստացել: Նա հավելել է, որ ճառագայթման այդաստիճան ավելացումը կարող է վնասակար լինել առողջության համար, եթե մարդն այդ վայրում է գտնվում երկար ժամանակ: Էդանոն նաև ասել է, որ տարհանման հարցը հիմա քննարկվում է կառավարության կողմից:
Այսօր տեղեկություններ են տարածվել այն մասին, որ ռադիոակտիվ յոդի պարունակությունը ատոմակայանի մերձակա ծովի ջրերում նորման գերազանցում է արդեն 4,500 անգամ:
