Նախօրեին Լոնդոնում մեծ շուքով նշվել է ԽՍՀՄ առաջին ու վերջին նախագահ Միխայիլ Գորբաչովի ծննդյան 80-ամյակը: Այդ օրը նրա անվան հետ մի քանի միջոցառումներ են կապված եղել: Գալա համերգը տեղի է ունեցել Մեծ Բրիտանիայի մայրաքաղաքի Ալբեր-հոլ հայտնի դահլիճում: Երեկոն սկսվել է Scorpions խմբի կատարմամբ «Փոփոխությունների քամի» (Wind of Change) երգով, որը խորհրդանշում է կոմունիզմի փլուզումը, որում գորբաչովն ունեցել է առանցքային դերակատարություն:
Երեկոն վարել են Շերոն Սթոունն ու Քևին Սփեյսին, ելույթ են ունեցել նաև Դմիտրի Խվորոստովսկին, Լարա Ֆաբիանը, Անդրեյ Մակարևիչը, Spice Girls-ը և «Տուրեցկու երգչախումբը»:
Գորբաչովը կարճ ելույթ ունեցել` ասելով, թե չէր էլ պատկերացնում, որ կարող է ապրել մինչև 80 տարեկանը, իսկ հիմա պարտավորություն է վերցնում ապրել մինչև 90 տարեկանը: Նա հույս է հայտնել, որ չնայած դարաշրջանի հակասություններին, ինքը կարողացել է մարդկանց տալ ազատության իդեալների ըմբռնում: Նա խոստովանել է, որ ժամանակի ընթացքում ինքը գիտակցել է, թե բարեփոխիչն անպայման չէ, որ պետք է դժբախտ լինի։ «Ես պետք է խոստովանեմ, որ ես երջանիկ մարդ եմ»,- ասել է նախկին նախագահը:
Երեկոյի ժամանակ Գորբաչովի անվան մրցանակները հանձնվել են երկու մարդու, որոնք փոխել են աշխարհը: Համացանցի հեղինակ սըր Թիմոթի Բերներս Լին ստացել է մրցանակ «Պերեստրոյկա» անվանակարգում, իսկ CNN-ի հիմնադիր Թեդ Թերները` «Գլասնոստ» անվանակարգում: «Ուսկորենիյե» անվանակարգի մրցանակն ստացել է 25-ամյա գիտնական Էվանս Վադոնգոն Քենիայից, որը 18 տարեկանում կարողացել է ստեղծել լամպ, որն աշխատում է արևի էներգիայով: Գորբաչովի մրցանակի բոլոր այս անվանակարգերի անունները պատահական չեն ընտրված, քանի որ երեքն էլ 1980-ականների ԽՍՀՄ գորբաչովյան քաղաքականության կարգախոսներն էին:
