ВВС հեռուստաալիքը, որն այսօր եթեր է հանել Way To Go անվանումը կրող նոր կինոկատակերգություն, զայրույթի ու քննադատության ալիք է բարձրացրել, այդ թվում՝ նաև բրիտանական խորհրդարանի անդամների շրջանում: Այս մասին հայտնում է newsru.co.il-ը:
Սերիալը, որի գլխավոր դերակատարը Բլեյք Հարիսոնն է, 3 երիտասարդի մասին է, որոնք «ինքնասպանության համար մեքենա» են ստեղծել և իրենց ծառայություններն են առաջարկում այն մարդկանց, ովքեր որոշել են ինքնասպան լինել:
Խորհրդարանի պատգամավոր Մարկ Պրիչարդը իր խիստ անհամաձայնությունն է հայտնել նախագծի հեղինակներին, որոնք, նրա խոսքով, ինքնասպանությունն օգտագործել են որպես կատակելու առիթ:
Тhe Sunday Express-ին տված հարցազրույցում Պրիչարդը հայտարարել է. «Շատ ցավալի է, որ ինքնասպան լինելու հարցում օգնելն այսօր մի շարք արտասահմանյան կլինիկաների համար դարձել է եկամտի աղբյուր, իսկ ВВС-ի համար՝ կատակերգական սյուժե»:
Քննադատությանն ի պատասխան՝ ВВС-3-ի ներկայացուցիչ Զայ Բեննեթն ասել է, որ Կուշելի սցենարը «դինամիկ է, անհեթեթ, սարկազմիկ ու հիանալի»:
Way To Go-ն սև հումորի ժանրում մինի-սերիալ է, որի սցենարը գրել է Բոբ Կուշելը` հայտնի «Սիմփսոններ» մուլտֆիլմի հեղինակը:
Հիշեցնեք, որ Swiss Medical Lawyers Association (SMLA) ընկերության կատարած հարցման արդյունքներով՝ Արևմտյան Եվրոպայի բնակիչների ճնշող մեծամասնությունը համարում է, որ մարդն իր իսկ ընտրած ճանապարհով կյանքից հեռանալու իրավունք ունի:
Հարցվածների մոտ երեք քառորդը հայտարարել է, որ կցանկանար կյանքից առանց ցավի հեռանալու հնարավորություն ունենալ, եթե անբուժելի, իրեն հաշմանդամ դարձնող կամ անտանելի ցավոտ հիվանդություն ունենար:
Հետաքրքիր է, որ էֆթանազիային, որը ներկայումս օրինական է միայն 4 եվրոպական երկրներում՝ Բելգիայում, Լյուքսեմբուրգում, Նիդերլանդներում և Շվեյցարիայում, կողմ է Մեծ Բրիտանայի բնակչության 71%-ը, Հունաստանի՝ 56%-ը: Այս պրակտիկայի ներմուծման հնարավորությունն այսօր քննարկվում է Գերմանիայում և Ֆրանսիայում:
