Ավստրալիայի հարավարևելյան շրջանից 240 կմ հեռավորության վրա գտնվող Տասմանիա կղզում 100 մարդ համարվում է անհայտ կորած՝ այնտեղ տեղի ունեցած անտառային ուժեղ հրդեհներից հետո:
Շրջանի փրկարար ծառայության աշխատակիցների տվյալներով՝ ավելի քան 10 խոշոր հրդեհներն ամայացրել են 80 մասնավոր հատված` ոչնչացնելով ավելի քան 100 տուն: Արդյունքում մի քանի հազար բնակիչներ ստիպված տեղափոխվել են մոտակա քաղաքներում բացված էվակուացիոն կենտրոններ:
Շոգ և չոր եղանակը դեռևս հնարավորություն չի տալիս հրշեջներին իրավիճակն ամբողջությամբ իրենց վերահսկողության տակ առնել: Ականատեսների վկայությամբ տեղ-տեղ կրակն այնքան ուժեղ է եղել, որ թվացել է, թե կանգնած են ռեակտիվ ինքնաթիռի հետնամասում:
Տասմանիայի բնակչությունը 512 հազար է: Նրանցից 200 հազարը բնակվում է Հաբարտեում, որտեղից էլ սկսել է հրդեհը:
