«Ժառանգություն» խմբակցության պատգամավոր Զարուհի Փոստանջյանը հանդես է եկել օրենսդրական նախաձեռնությամբ, որով առաջարկում է, որ ԱԺ պատգամավորները պարտավոր են իրենց կատարած աշխատանքի համար հաշվետվություն ներկայացնել ԱԺ-ին:
ԱԺ պետաիրավական հանձնաժողովի նիստում ներկայացնելով նախագիծը՝ նա ընդգծեց. «Պատգամավորն այս օրինագծով պետք է լրացուցիչ պարտականություն կրի և իր կատարած աշխատանքի հաշվետվությունը ներկայացնի, ինչը պայմանավորված է նրանով, որ շատ պատգամավորներ երբևէ որևէ նախաձեռնությամբ հանդես չեն եկել, երբեք հանձնաժողովի նիստերին ելույթներով հանդես չեն եկել»,- ասաց նա:
Հովհաննես Մարգարյանը կարևորեց նախագիծը, սակայն հարց ուղղեց, թե ի՞նչ պետք է տեղի ունենա, եթե պատգամավորը հաշվետվությունը չներկայացնի:
Ի պատասխան՝ Փոստանջյանն ասաց. «Նախատեսված է պարտականություն, մենք գնում ենք գործուղման, պարտավոր ենք հաշվետվություն ներկայացնել: Այս հաշվետվությունը պետք է գրանցվի և հանրությանը մատչելի լինի: Էթիկայի հանձնաժողովը դա մեզ թույլ է տալիս: Գոնե մենք իմանանք՝ ովքեր են այն պատգամավորները, որոնք մեծամասնականով ընտրվում են: Մենք նրանց միայն առաջին օրը և քվեարկության օրերին ենք տեսնում»:
Օրինագծին դեմ արտահայտվեց ՀԱԿ խմբակցության պատգամավոր Գագիկ Ջհանգիրյանը՝ նշելով. «Ես շատ լավ հասկանում եմ, թե ինչ նկատառումներից ելնելով եք այս նախագիծը ներկայացնում, գուցե նաև իշխանություններին, բայց, Սահմանադրության համաձայն, պատգամավորը կաշկանդված չէ իր մանդատով, գործում է ազատ: Օրինակ՝ Էդմոն Մարուքյանը, որ մեծամասնականով է ընտրվել, հաշվետու չէ իր ընտրողին, քանի որ հետկանչի ինստիտուտ չկա: Եթե լիներ այդ ինստիտուտը, ես կստորագրեի այս նախագծի տակ»:
