Ֆոտոլրագրող Մայքլ Քրիստոֆեր Բրաունը բազմաթիվ շարքեր է նկարահանել Կոնգոյի մասին։ Աֆրիկյան այդ երկրի մասին «ոսկե միլիարդի» բնակիչները գրեթե ոչինչ չգիտեն։ Բրաունի նախագծերը շոշափում են կոնգոլեզյան իրականության բոլոր կողմերը՝ կենցաղը, ավանդույթները, աշխատանքը, պատերազմը։ Ահա թե ինչ է պատմում լուսանկարիչն իր աշխատանքի մասին։
«Ինչպես բազմաթիվ ֆոտոլրագրողներ, ես էլ եմ որոշ բաներ iPhone-ով նկարում։ Բջջային հեռախոսը թույլ է տալիս թաքցնել այն փաստը, որ դու պրոֆեսիոնալ լուսանկարիչ ես։ Իմ հերոսների համար ես մարդ եմ ամբոխից։ Աննկատ լինելը կարևոր է նախևառաջ Կոնգոյի Ժողովրդական Հանրապետության արևելյան հատվածում. զանազան զինված կազմավորումներ և պետություններ մարտնչում են օգտակար հանածոնների նկատմամբ հսկողության համար, իսկ հանածոներն օգտագործում են արդեն մեկ դարից ավելի այդ տարածքում ընթացող պատերազմի, գազանությունների ու բռնությունների հետագա ֆինանսավորման համար։
Կոնգոն հիմնականում հումքային երկիր է։ Էլեկտրոնային ինդուստրիան այստեղի հանածոների՝ տուրմալինի, անագաքարի և կոլտանի գլխավոր սպառողն է։ Դրանցից պատրաստում են կարևորագույն մասեր հեռախոսների, նոթբուքերի և ուրիշ գաջեթների համար։
Ես Կոնգո ժամանեցի 2012-ի օգոստոսին, որպեսզի նկարեմ հանածոների ուղին հանքավայրից մինչև երկրի սահման, և այն, թե այդ հանածոների վաճառքն ինչպես է ազդում ամբողջ ժամանակ դրանց հետ գործ ունեցող բանվորների կյանքի վրա։ Լուսանկարներն ավելի շատ ստացվում են այն մասին, ինչ ես զգում եմ և տեսնում»։
