ՀԺԿ նախկին անդամ, ոստիկանության, իսկ ավելի կոնկրետ՝ Երևանի ոստիկանապետ Աշոտ Կարապետյանի կողմից 2004 թվականին խոշտանգված Գրիշա Վիրաբյանի գործը դեռևս օգոստոս ամսին վերաբացվել և այդ ժամանակավանից գտնվում է նախաքննական փուլում:
Հիշեցնենք, որ այն բանից հետո, ինչ Եվրադատարանը Վիրաբյանի օգտին որոշում կայացրեց, և Հայաստանի Հանրապետությունը ստիպված եղավ փոխհատուցել ընդդիմադիր գործչին, Վիրաբյանը նորից դիմել էր Հայաստանի արդարադատությանը մեղավորներին պատժելու պահանջով:
«Առաջին լրատվական»-ի հետ զրույցում Գրիշա Վիրաբյանն ասաց, որ պատրաստվում է լրացուցիչ նամակ ուղարկել Եվրադատարան: Նրա կարծիքով՝ գործն անհիմն հետաձգվում է։ «Գուցե մտածում են՝ ես հուսահատվեմ, կամ մեկին ինչ-որ բան լինի, բայց ինձանից պրծում չունեն՝ մինչև վերջ գնալու եմ»,- ասաց նա:
Նրա խոսքերով՝ գործը շատ դանդաղ է ընթանում՝ դեռևս մեկ-երկու ամիս առաջ նախաքննությունը պետք է ավարտված լիներ։ «Ի՞նչ է, սպասում են՝ բոլորը մահանան, նո՞ր գործ հարուցեն, կամ գործով անցնող ոստիկանները թոշակի՞ գնան: Արդեն ութ տարի է անցել, մի քիչ էլ ձգեն՝ բոլորը թոշակի կանցնեն»,- հարցադրում արեց Վիրաբյանը:
Մեր զրուցակիցն ավելացրեց, որ կառավարությանը ժամանակ էր տրված բողոքարկելու, սակայն նրանք դա չեն արել․ «Մենք էլ դիեմցինք, որպեսզի Հայաստանի արդարադատությունը կատարի Եվրադատարանի պահանջները:
Ես ուզում եմ, որ այդ մարդիկ պատասխանատվություն կրեն, ես թոշակառուների հետևից չեմ ուզում ընկնել, ես ուզում եմ, որ այդ մարդիկ պատժվեն ու պատասխանատվություն կրեն իրենց արածի համար։
Ամեն ինչ անելու եմ, որ գործիի քննության ժաանակ ուշադրություն դարձնեն հենց Աշոտ Կարապետյանի վրա: Եվ ես շարունակելու եմ համառել, որ իմ փաստաբանները դիմում ներկայացնեն, որպեսզի Աշոտ Կարապետյանի լիազոությունները ժամանակավորապես դադարեցվեն»:
Հարցին, թե մտավախություն ունի, որ Երևանի ոստիկանապետ Աշոտ Կարապետյանը կարող է ճնշո՞ւմ գործադրել ՀՔԾ-ի վրա, Գրիշա Վիրաբյանը պատասխանեց․ «Ոչ, բայց նա կարող է ճնշում գործադրել այն ոստիկանների վրա, որոնք այդ գործով անցնում են: Չի բացառվում, որ Աշոտ Կարապետյանը գործով անցնող ոստիկաններից մեկին ասի՝ ամբողջ մեղքը վերցրու քո վրա, կամ ասի՝ հրաժարվեք, որ ես կարգադրել եմ ձեռնաշղթաներ հագցնել Գրիշա Վիրաբյանին: Կարճ ասած՝ Աշոտ Կարապետյանը կարող է ազդել այն մանրուքների վրա, որոնք կփոխեն գործի էությունը»:
