«2004-ից հետո 83 հուշարձան խեղաթյուրվեց: Երևանում հիսուն հուշարձան այլևս գոյություն չունի: Առաջարկում եմ՝ հուշարձանների հաստատումը օրենքի ուժով բերենք». այսօր ԱԺ-ում բյուջեի նախագծի քննարկմանը Արամ Մանուկյանը դիմեց մշակույթի նախարար Հասմիկ Պողոսյանին:
Ի պատասխան՝ նախարարը նշեց, որ հուշարձանների օրենքը բավական երկար ժամանակ ընդունված է. «Մենք առաջարկեցինք, որ համատեղ քննարկման ժամանակ գանք ընդհանուր եզրակցության։ Կառավարությունը հուշարձանների ցանկից որևէ հուշարձան չի հանել, 16 հուշարձանների տեղափոխման որոշում է եղել: Մեր իրականության մեջ եղան դեպքեր, երբ մենք իսկապես չհարգեցինք, չկարողացանք պահպանել հուշարձանը, բայց երբ մենք վերցնում ենք գլոբալ, թե հուշարձանների պահպանությունը ինչ զարգացում է ապրել, եթե մենք բոլոր խնդիրները վերցնենք կողք կողքի դնենք՝ կտեսնենք, որ զգալի աշխատանք է կատարվել: Օրենսդրական փաթեթը մշակված է, մնում է, որ մենք ծանր ու թեթև անելով, քննարկելով՝ միասին պահպանենք հուշարձանների շահերը: Առաջարկում ենք քննարկել: Բյուջետային քննարկումները երբ ավարտվեն՝ եկեք քննարկենք»,- ասաց նախարարը:
Լուսանկարը՝ Armenpress-ի
